NCERT Class 9 Urdu Jamna Chapter 10 Allah Agar Taufeeq Na De Insaan Ke Bas Ka Kaam Nahin PDF Download

جگر مراد آبادی (1890 - 1960)

جگرؔ مراد آبادی کا نام علی سکندر اور جگرؔ تخلص تھا۔ وہ مراد آباد میں پیدا ہوئے لیکن عمر کا زیادہ تر حصہ شہر گونڈہ میں گزرا، انتقال بھی وہیں ہوا۔ جگرؔ نے تعلیم و تربیت گھر پر ہی حاصل کی۔ اپنی محنت اور ذہانت کی وجہ سے بہت کم وقت میں زبان و بیان پر عبور حاصل کر لیا۔ شاعری جگرؔ کو وراثت میں ملی تھی۔ ان کے والد مولوی نظر علی صاحبِ دیوان شاعر تھے۔ جگرؔ نے ابتدائی دور میں اپنے والد سے کلام پر اصلاح لی۔ ان کے بعد داغؔ دہلوی اور ان کے شاگرد تسلیمؔ دہلوی کی شاگردی اختیار کی۔ جگرؔ کی شاعری پر داغؔ کی زبان کے اثرات نمایاں ہیں۔

جگرؔ کی شاعری میں کیفیت اور بے خودی کی لہر ہر جگہ نظر آتی ہے۔ ان کی شاعری کی نمایاں خصوصیت سادگی اور روانی ہے۔ انداز دل کش اور دل نشین ہے۔ محاورات اور روزمرہ کا استعمال بھی خوب صورتی کے ساتھ کیا گیا ہے۔ 'داغِ جگر'، 'آتشِ گُل'، 'شعلۂ طور' اُن کے شعری مجموعے ہیں۔ جگرؔ کا مکمل کلام 'کلیاتِ جگر' کے نام سے شائع ہوا۔

استاد کا نوٹ

الف) جگرؔ مراد آبادی کا اصل نام علی سکندر تھا؛ 'جگرؔ' ان کا تخلص ہے۔
ب) ان کے استادوں کی ترتیب یاد رکھیے: پہلے والد مولوی نظر علی، پھر داغؔ دہلوی اور تسلیمؔ دہلوی۔
ج) ان کے تین شعری مجموعے ہیں: 'داغِ جگر'، 'آتشِ گُل' اور 'شعلۂ طور'۔

سبق 10: غزل

اللہ اگر توفیق نہ دے انسان کے بس کا کام نہیں
فیضانِ محبت عام سہی عرفانِ محبت عام نہیں

یہ تو نے کہا کیا اے ناداں فیاضیِ قدرت عام نہیں
تو فکر و نظر تو پیدا کر کیا چیز ہے جو انعام نہیں

یارب یہ مقامِ عشق ہے کیا گو دیدہ و دل ناکام نہیں
تسکین ہے اور تسکین نہیں آرام ہے اور آرام نہیں

آنا ہے جو بزمِ جاناں میں پندارِ خودی کو توڑ کے آ
اے ہوش و خرد کے دیوانے یاں ہوش و خرد کا کام نہیں

عشق اور گوارا خود کر لے بے شرط شکستِ فاش اپنی
دل کی بھی کچھ ان کے سازش ہے تنہا یہ نظر کا کام نہیں

سب جس کو اسیری کہتے ہیں وہ تو ہے اسیری ہی لیکن
وہ کون سی آزادی ہے یہاں جو آپ خود اپنا دام نہیں

- جگرؔ مراد آبادی

استاد کا نوٹ

الف) اس غزل کی ردیف 'نہیں' ہے اور قافیے کام، عام، انعام، ناکام، آرام اور دام ہیں۔
ب) 'فیضان' (فیض پہنچنا) اور 'عرفان' (گہری پہچان) کا فرق سمجھیے؛ پہلا شعر انھی دو لفظوں پر قائم ہے۔
ج) 'دام' کا مطلب یہاں جال (پھندا) ہے اور 'اسیری' کا مطلب قید۔