NCERT Class 9 Urdu Jamna Chapter 09 Teer Khane Ki Hawas Hai To Jigar Paida Kar PDF Download

امیر مینائی (1828 - 1900)

امیر مینائی کا اصل نام امیر احمد تھا۔ وہ لکھنؤ میں پیدا ہوئے۔ والد کا نام کرم احمد مینائی تھا۔ حضرت مخدوم شاہ مینا کے خاندان سے تعلق رکھتے تھے اور اسی سبب اپنے نام کے ساتھ مینائی لکھتے تھے۔ شروع میں اپنے بڑے بھائی حافظ عنایت حسین اور اپنے والد سے تعلیم پائی۔ شاعری کا شوق بچپن سے تھا۔ پندرہ سال کی عمر میں منشی مظفر علی اسیرؔ کے شاگرد ہوئے جو اپنے زمانے کے مشہور شاعر اور ماہرِ عروض تھے۔ واجد علی شاہ کی معزولی کے بعد وہ نواب رام پور سے وابستہ ہوئے۔ کچھ عرصہ بعد حیدر آباد منتقل ہو گئے اور وہیں ان کا انتقال ہوا۔

شاعری کے علاوہ امیر مینائی کو طب اور نجوم سے بھی دل چسپی تھی۔ 'نورِ تجلّی' اور 'ابرِ کرم' ان کی نعتیہ مثنویاں ہیں۔ 'امیر اللغات' بھی ان کا اہم کارنامہ ہے۔ امیر مینائی نے یوں تو تمام اصناف میں طبع آزمائی کی تاہم غزل ان کا خاص میدان ہے۔ ان کی شاعرانہ زندگی کا بیشتر حصہ لکھنؤ اور رام پور میں گزرا لیکن ان کی غزلوں پر دہلوی رنگ نمایاں ہے۔ 'مرآۃ الغیب' اور 'صنم خانۂ عشق' ان کے دیوان ہیں۔

استاد کا نوٹ

الف) 'مینائی' ان کے خاندان (حضرت مخدوم شاہ مینا) کی نسبت سے ہے، تخلص نہیں؛ ان کا تخلص 'امیرؔ' ہے۔
ب) ان کے دو دیوان یاد رکھیے: 'مرآۃ الغیب' اور 'صنم خانۂ عشق'۔
ج) 'امیر اللغات' لغت (ڈکشنری) کا کام ہے، شاعری کا مجموعہ نہیں۔

سبق 9: غزل

تیر کھانے کی ہوس ہے تو جگر پیدا کر
سرفروشی کی تمنا ہے تو سر پیدا کر

رنگ چاہے اگر اس باغ میں آزادی کا
نکہتِ گُل کی طرح شوقِ سفر پیدا کر

کون سی جا ہے جہاں جلوۂ معشوق نہیں
شوقِ دیدار اگر ہے تو نظر پیدا کر

میرے ہی دل پہ گرے کاش یہ بجلی بن کر
اے فلک آہ میں اتنا ہی اثر پیدا کر

اپنی گردش پہ بہت ہے تجھے اے چرخ، گھمنڈ
جب میں جانوں کہ شبِ غم کی سحر پیدا کر

صدمے الفت کے اٹھانے ہیں الٰہی مشکل
دل اگر ایک دیا لاکھ جگر پیدا کر

عشق بازی کا اگر حوصلہ رکھتا ہے امیرؔ
دل جو لوہے کا تو پتھر کا جگر پیدا کر

- امیر مینائی

استاد کا نوٹ

الف) اس غزل کی ردیف 'پیدا کر' ہے اور قافیے جگر، سر، سفر، نظر، اثر، سحر ہیں۔
ب) 'چرخ' اور 'فلک' دونوں آسمان کے لیے آئے ہیں؛ پرانی شاعری میں آسمان کی 'گردش' کو قسمت سے جوڑا جاتا تھا۔
ج) آخری شعر میں تخلص 'امیرؔ' آیا ہے، اس لیے یہ مقطع ہے۔