NCERT Class 9 Urdu Jamna Chapter 15 Qitaat Zehan Ka Koi Noor Paash Khayal PDF Download

قطعہ

قطعہ کے لغوی معنی کسی چیز کے حصے یا ٹکڑے کے ہیں۔ شعری اصطلاح میں قطعہ ایسی نظم کو کہتے ہیں جس میں کسی مضمون کا مسلسل بیان ہو۔ اس کے لیے کوئی بحر مخصوص نہیں ہے۔ اس میں کسی خیال یا تجربے کو پوری شدت اور وحدتِ تاثر کے ساتھ بیان کیا جاتا ہے۔ قطعہ عام طور پر چار مصرعوں کی نظم ہوتی ہے۔ اس میں دو سے زیادہ اشعار بھی ہو سکتے ہیں۔ ضروری نہیں کہ اس کے پہلے دونوں مصرعے ہم قافیہ ہوں۔

کلاسیکی شاعروں کے یہاں قطعہ عموماً غزل کے اشعار میں ملتا ہے۔ غزل کے ایسے دو یا دو سے زیادہ اشعار جن میں کوئی مضمون یا خیال تسلسل کے ساتھ پیش کیا جائے، انھیں 'قطعہ بند' اشعار کہتے ہیں۔ قطعہ بند اشعار کی اس روایت کو بعد کے شعرا نے مزید وسعت دی اور اسے ایک علاحدہ صنف کا مقام عطا کیا۔

غزل کے اشعار کے درمیان قطعہ گوئی کی روایت قدیم زمانے سے چلی آتی ہے۔ البتہ ایک علاحدہ صنف کے طور پر اسے استحکام عطا کرنے والوں میں وحید الدین سلیم اور اختر انصاری کے نام نمایاں ہیں۔ بعد میں احمد ندیم قاسمی اور نریش کمار شادؔ نے قطعہ گوئی کے فن کو فروغ دیا۔

قطعے میں عام طور پر چار مصرعے ہوتے ہیں اور رباعی بھی چار مصرعوں کی ایک نظم ہوتی ہے۔ لیکن دونوں میں فرق یہ ہے کہ رباعی کے لیے بحرِ ہزج کے کچھ خاص اوزان مخصوص ہیں جب کہ قطعہ غزل کی طرح ہر بحر میں کہا جا سکتا ہے۔

استاد کا نوٹ

الف) قطعہ اور رباعی دونوں عموماً چار مصرعوں کے ہوتے ہیں؛ فرق یہ ہے کہ رباعی بحرِ ہزج کے خاص اوزان میں ہوتی ہے اور قطعہ کسی بھی بحر میں۔
ب) غزل کے وہ اشعار جن میں ایک ہی مضمون تسلسل سے چلے 'قطعہ بند' اشعار کہلاتے ہیں۔
ج) قطعہ کو الگ صنف بنانے والوں میں وحید الدین سلیم اور اختر انصاری کے نام یاد رکھیے۔

نریش کمار شاد (1927 - 1969)

نریش کمار شادؔ کی پیدائش ہوشیار پور میں ہوئی۔ شاعری کے لیے انھوں نے شادؔ تخلص اختیار کیا۔ ان کے والد شاعر اور صحافی تھے۔ گھر کا ماحول علمی و ادبی تھا۔ کم عمری میں ہی شعر کہنا شروع کر دیا۔ والد کی اصلاح اور حوصلہ افزائی نے ان کی اسی طبیعت کو جلا بخشی۔ شادؔ نے ہوشیار پور سے ابتدائی اور ثانوی تعلیم حاصل کی۔ کچھ عرصے ملازمت کے سلسلے میں راولپنڈی اور جالندھر میں رہے۔ بعد میں ملازمت ترک کر کے لاہور چلے گئے اور ماہنامہ 'شالیمار' کے مدیر بن گئے۔ تقسیمِ ملک کے بعد وہ کانپور آگئے۔ کانپور سے شائع ہونے والے 'چندن' اور بعد میں دہلی سے شائع ہونے والے رسالے 'راہی' کی ادارت کے فرائض بھی انجام دیے۔

شادؔ شاعری میں جوشؔ ملسیانی کے شاگرد تھے جو خود داغؔ دہلوی کے شاگرد تھے۔ یہی وجہ ہے کہ شادؔ کی زبان میں دہلوی رنگ نمایاں ہے۔

شادؔ نے غزل، قطعات اور رباعیات لکھی ہیں لیکن بنیادی طور پر ان کی شہرت قطعہ اور رباعی کی وجہ سے ہے۔ انھوں نے اپنے قطعات میں عموماً پند و نصح اور اخلاقیات کے مضامین بیان کیے ہیں۔ شادؔ کے شعری مجموعوں میں 'دستک، قاشیں، فریاد، آیاتِ جنوں، سنگم، شاد نامہ' وغیرہ شامل ہیں۔ اُن کا ایک اور وقیع کارنامہ حافظ شیرازی کے فارسی کلام کا اردو ترجمہ ہے جو 'دو آتشہ' کے نام سے شائع ہوا۔

سبق 15: قطعات

(1)
ذہن کا کوئی نور پاش خیال
جب تک اعمال میں نہیں ڈھلتا
زندگی کے بجھے ہوئے دل میں
آگہی کا دیا نہیں جلتا

(2)
ایک شاعر کی آنکھ جب چاہے
حسنِ فطرت کو تول سکتی ہے
دیکھ سکتی ہے نکہتِ گل کو
چاند، تاروں سے بول سکتی ہے

[تصویر: چاندنی رات میں درختوں اور سبزے کا منظر، اپنی درسی کتاب میں دیکھیں]

استاد کا نوٹ

الف) دونوں قطعات میں دوسرا اور چوتھا مصرع ہم قافیہ ہیں (ڈھلتا / جلتا، تول / بول)؛ پہلے دو مصرعوں کا ہم قافیہ ہونا ضروری نہیں۔
ب) 'نور پاش' کا مطلب ہے روشنی پھیلانے والا اور 'آگہی' یعنی شعور، سمجھ۔
ج) شادؔ کی استادی کی کڑی یاد رکھیے: شادؔ، جوشؔ ملسیانی کے شاگرد اور جوشؔ، داغؔ دہلوی کے شاگرد تھے۔