NCERT Class 9 Urdu Jamna Chapter 06 Mian Naseer-ud-Din PDF Download

کرشنا سوبتی (1925 - 2019)

کرشنا سوبتی کا اصل نام وی. ایس کرشنا سوبتی ہے۔ وہ ایک مشہور افسانہ نگار، مضمون نگار اور مصنفہ تھیں۔ ان کی تعلیم شملہ اور دہلی میں ہوئی۔ تقسیمِ ہند کے بعد انھوں نے راجستھان کے مہاراجہ تیج سنگھ کے یہاں بطور افسرِ انتظامیہ کام کیا۔ 1980 تک وہ دہلی انتظامیہ کے محکمۂ تعلیمِ بالغان میں ایڈیٹر رہیں۔

کرشنا سوبتی نے 1950 کی دہائی کے آغاز میں افسانے لکھنے شروع کیے اور جلد ہی ادبی دنیا میں اپنی شناخت قائم کر لی۔ ان کا پہلا ناول 'ڈار سے بچھڑی' 1958 میں شائع ہوا جو بہت مقبول ہوا۔ اس کے علاوہ 'مِتّر و مر جانی'، 'یاروں کے یار'، کافی مشہور ہوئے، انھوں نے انسانی قدروں کے زوال، استحصال زدہ طبقے اور خصوصاً عورت اور مرد کے تعلقات کی پیچیدگیوں کو اپنا موضوع بنایا۔

ان کی کہانیوں کے مجموعوں میں 'بادلوں کے گھیرے'، 'سورج مکھی' اور 'اندھیرے' شامل ہیں۔ ناولوں میں 'زندگی نامہ'، 'دل و دانش'، 'اے لڑکی' وغیرہ اہم نام ہیں۔ 'ہم حشمت' ان کی یادداشت ہے۔ انھیں 'گیان پیٹھ ایوارڈ' اور 'ساہتیہ اکادمی ایوارڈ' اعزازات سے نوازا گیا۔ 'میاں نصیر الدین' ان کے ہندی مجموعے 'ہم حشمت' سے لیا گیا ہے۔

استاد کا نوٹ

الف) کرشنا سوبتی کا پہلا ناول 'ڈار سے بچھڑی' (1958) ہے۔
ب) انھیں دو بڑے اعزاز ملے: 'گیان پیٹھ ایوارڈ' اور 'ساہتیہ اکادمی ایوارڈ'۔
ج) یہ سبق ان کی یادداشت 'ہم حشمت' سے لیا گیا ہے، جو اصل میں ہندی میں ہے۔

سبق 6: میاں نصیر الدین

صاحبو! اس روز ہم مٹیا محل کی طرف سے نہ گزرتے تو سیاست، ادب اور فن کے ہزارہا مسیحاؤں کے دھوم دھڑکے میں نان بائیوں کے مسیحا میاں نصیر الدین کو کیسے پہچانتے؟ اور کیسے اٹھاتے لطف ان کے مسیحائی انداز کا!

ہوا یہ کہ ہم ایک دوپہر جامع مسجد سے لگے ہوئے محلّے مٹیا محل کے گڑھیّا محلّے کی طرف نکل گئے۔ ایک نہایت معمولی اندھیری سی دکان پر پٹاپٹ آٹے کا ڈھیر گندھتے دیکھ ٹھٹکے۔ سوچا، سوَیّوں کی تیاری ہوگی۔

[تصویر: تنور کے پاس کھڑے میاں نصیر الدین، اپنی درسی کتاب میں دیکھیں]

مگر پوچھنے پر معلوم ہوا خاندانی نان بائی میاں نصیر الدین کی دکان پر کھڑے ہیں۔ میاں مشہور رہیں، چھپّن قسم کی روٹیاں پکانے کے لیے۔

ہم نے جو اندر جھانکا تو پایا کہ میاں چارپائی پر بیٹھے مزہ لے رہے ہیں۔ موسموں کی مار سے پکا چہرہ، آنکھوں میں کائیاں، بھولا پن اور پیشانی پر منجھے ہوئے کاریگر کے تیور۔

ہمیں گاہک سمجھ کر میاں نے نظر اٹھائی — "فرمائیے!"

جھجک کر کہا: "آپ سے کچھ سوال پوچھنے تھے۔ آپ کو وقت ہو تو..."

میاں نصیر الدین نے پنج ہزاری انداز میں سر ہلایا: "نکال لیں گے وقت تھوڑا۔ مگر یہ تو کہیے کہ آپ کو پوچھنا کیا ہے؟"

پھر گھور کر دیکھا اور بولے: "میاں! کہیں اخبار نویس تو نہیں ہو؟ یہ تو کھوجیوں کا شوق ہے۔ ہاں! کام کاجی آدمی کو اس سے کیا غرض؟ خیر! آپ نے یہاں تک آنے کی زحمت اٹھائی ہی ہے تو پوچھیے، کیا پوچھنا چاہتے ہیں؟"

"پوچھنا یہ تھا کہ قسم قسم کی روٹیاں پکانے کا علم آپ نے کہاں سے حاصل کیا؟"

میاں نصیر الدین نے آنکھوں کے ڈھیلے ہم پر جما دیے۔ پھر تریر کر بولے: "کیا مطلب؟ بھلا بتائیے صاحب، نان بائی علم حاصل کرنے کے لیے کہیں اور جائے گا؟ کیا نگینہ ساز کے پاس؟ کیا آئینہ ساز کے پاس؟ کیا مینا ساز کے پاس؟ کیا فرمایا صاحب؟ یہ تو ہمارا خاندانی پیشہ ٹھہرا۔ ہاں علم کی بات پوچھیے تو جو کچھ بھی سیکھا اپنے والد استاد سے ہی۔ مطلب یہ کہ ہم گھر سے نہ نکلے کہ کوئی پیشہ اختیار کریں گے۔ جو باپ دادا کا ہنر تھا وہی ان سے پایا اور والد مرحوم کے اُٹھ جانے پر آ بیٹھے انھیں کے ٹھیے پر۔"

"آپ کے والد...؟"

میاں نصیر الدین کی آنکھیں پل بھر کے لیے کسی بھٹی میں گم ہو گئیں۔ لگا گہری سوچ میں ہیں۔ پھر سر ہلایا: "کیا آنکھوں کے سامنے چہرہ زندہ ہو گیا! ہاں! ہمارے والد صاحب مشہور تھے، میاں برکت شاہی نان بائی گڑھیّا والے کے نام سے اور ان کے والد یعنی کہ ہمارے دادا صاحب تھے اعلیٰ نان بائی میاں کلّن!"

استاد کا نوٹ

الف) میاں نصیر الدین کی تین نسلیں یاد رکھیے: دادا میاں کلّن، والد میاں برکت شاہی اور خود میاں نصیر الدین۔
ب) مصنفہ نے میاں کے چہرے کا نقشہ کچھ الفاظ میں کھینچا ہے: 'موسموں کی مار سے پکا چہرہ، آنکھوں میں کائیاں، بھولا پن'؛ ایسی تصویر کشی کو خاکہ نگاری کہتے ہیں۔
ج) 'ٹھیا' سے مراد وہ جگہ ہے جہاں کاریگر بیٹھ کر کام کرتا ہے۔