NCERT Class 8 Urdu Khayaal Chapter 14 Everest Ki Fateh PDF Download

سبق 12: ایورسٹ کی فتح

ایورسٹ پر چڑھنے کے لیے ہماری ٹیم 7/مارچ کو دہلی سے کٹھمنڈو بذریعہ جہاز روانہ ہوئی۔ کٹھمنڈو میں چند روز قیام رہا پھر ہم زیری کے لیے روانہ ہوئے۔ وہاں سے ہم مزے میں پیدل سفر کرتے ہوئے آٹھ دن میں نامچی بازار پہنچے۔ نامچی بازار شیرپا لینڈ کا اہم قصبہ ہے۔ یہیں میں نے پہلی بار ایورسٹ کو دیکھا تھا۔ نیپالی لوگ اسے 'ساگر ماتھا' کہتے ہیں۔ ایورسٹ پر ٹکٹکی باندھے ہوئے میں برف کے ایک بہت بڑے تودے کو دیکھ سکتی تھی جو چوٹی سے ایک پھریرے کی طرح لہراتا ہوا معلوم ہوتا تھا۔ برف کا یہ پھریرا دس کلومیٹر یا اس سے بھی لمبا ہو سکتا ہے۔

ایک دن یہاں رکنے کے بعد ہم مشہور تھیانگ بوچھے مٹھ پہنچے۔ یہاں لاما نے ہمارے لیے کامیابی اور بخیریت واپسی کے لیے دعا مانگی۔ یہاں دو روز قیام کرنے کے بعد ہم پھر نیچے پہنچے۔

26/مارچ کو جب ہم نیچے پہنچے تو ہمیں ایک دہشت انگیز خبر ملی۔ برفانی جھکّڑ میں ایک شیرپا قلی ہلاک ہو گیا تھا۔ ہماری مہم کے سربراہ کرنل کھُلّر نے اس بات کو محسوس کر لیا تھا کہ اس خبر نے ہم سبھی کو افسردہ کر دیا ہے۔ انھوں نے کہا: "کسی ایک حادثے سے ہمیں بے جا حد تک پریشان نہیں ہونا چاہیے اور نہ ہی اپنے ارادے میں کوئی کمزوری آنے دینا چاہیے۔"

[تصویر: کوہ پیما، اپنی درسی کتاب میں دیکھیں]

استاد کا نوٹ

الف) سفر کی ترتیب یاد رکھیے: دہلی سے کٹھمنڈو (جہاز سے)، پھر زیری، پھر آٹھ دن پیدل چل کر نامچی بازار، اور پھر تھیانگ بوچھے مٹھ۔
ب) نیپالی لوگ ایورسٹ کو 'ساگر ماتھا' کہتے ہیں؛ مہم کے سربراہ کرنل کھُلّر تھے۔
ج) یہ سبق 'میں' کی زبانی ہے اور کہنے والی ایک خاتون ہیں (دیکھ سکتی تھی، دیکھ رہی تھی)؛ 'ٹکٹکی باندھنا' یعنی نظر جما کر دیکھنا۔

صدر کیمپ پہنچنے سے پہلے ایک خراب خبر اور ملی تھی۔ کچن کے ایک ملازم کی موت ہو گئی تھی۔ اگلے دن صدر کیمپ پہنچنے پر میں نے ایورسٹ پہاڑوں کے گٹھے ہوئے سلسلے اور اس کے ذیلی سلسلوں کو دیکھا۔ میں مبہوت کھڑی جمی ہوئی برف کے بے ترتیب ٹھوس دریا کو حیرت سے دیکھ رہی تھی۔ ہم کھمبو گلیشیر کو کم فاصلے یعنی ایک کلومیٹر سے تقریباً چھ سو میٹر نیچے گرتا ہوا دیکھ سکتے تھے۔ گلیشیر یا برفشار جمی ہوئی برف کے میناروں اور تودوں کا گڈمڈ آبشار سا ہے۔ ہمیں بتایا گیا کہ گلیشیر کی نقل و حرکت سے اکثر برف میں زلزلے بپا ہوتے ہیں۔ جس کے نتیجے میں برف کی بڑی بڑی سِلیں تیزی سے نیچے گرنے لگتی ہیں۔

پہلا کیمپ چھ ہزار میٹر کی بلندی پر برفشار کے بس ذرا اوپر تھا۔ میں جلد سے جلد برفشار کے قریب پہنچنا چاہتی تھی۔ اسی شام میں اپنے بعض ساتھیوں کے ساتھ اس مقام تک جا پہنچی۔ ماہ اپریل میں جب میں صدر کیمپ میں تھی، تین سنگھ اپنی سب سے چھوٹی بیٹی ڈیکی کے ساتھ کیمپ میں تشریف لائے تھے۔ جب میں نے ان کو بتایا کہ میں قطعی نو مشق ہوں اور ایورسٹ پر چڑھائی کی یہ میری پہلی مہم ہے تو انھوں نے ہنس کر کہا "ایورسٹ میری بھی پہلی مہم تھی اور چوٹی کو میں ساتویں کوشش میں سر کر سکا تھا۔"

[تصویر: برفیلے پہاڑوں کے بیچ پہاڑی بستی اور چڑھائی کرتا کوہ پیما، اپنی درسی کتاب میں دیکھیں]

استاد کا نوٹ

الف) 'گلیشیر' یا 'برفشار' جمی ہوئی برف کے میناروں اور تودوں کا ڈھیر ہے؛ یہاں کھمبو گلیشیر کا ذکر ہے۔
ب) پہلا کیمپ چھ ہزار میٹر کی بلندی پر برفشار سے ذرا اوپر تھا۔
ج) 'مبہوت' یعنی حیرت سے ساکت، 'نو مشق' یعنی نیا اور ناتجربہ کار، اور 'سر کرنا' یعنی فتح کرنا۔