NCERT Class 8 Urdu Khayaal Chapter 15 Azm-o-Amal PDF Download

عزم و عمل

(پڑھنے کے لیے)

ذہن کی تاریکیوں کو دور ہونا چاہیے
علم سے ادراک کو پُر نور ہونا چاہیے

امتحاں کا خوف دل سے دور ہونا چاہیے
وقت کا ہر فیصلہ منظور ہونا چاہیے

عزم و استقلال سے انسان پہنچا چاند پر
دل کو اب تو اور بھی مسرور ہونا چاہیے

جذبۂ ایثار سے ہوتی ہے تعمیرِ حیات
دل کو احساسات سے معمور ہونا چاہیے

بے اصولی سے نہیں ہوتا ہے کوئی سُرخرُو
کام کرنے کا بھی اک دستور ہونا چاہیے

[تصویر: لائبریری اور تجربہ گاہ میں کام کرتے بچے، اپنی درسی کتاب میں دیکھیں]

حوصلوں کے سامنے ہر امتحاں اک کھیل ہے
جذبۂ عزم و عمل بھر پور ہونا چاہیے

نامرادی بھی اگر آئے تو کوئی غم نہ ہو
زندگی کا کچھ یہی دستور ہونا چاہیے

تنگ نظری کو زمانے سے مٹانے کے لیے
علم سے اخلاق سے معمور ہونا چاہیے

یہ مشینی دور ہے رفتار اس کی تیز ہے
آگے بڑھنا ہی تمھیں منظور ہونا چاہیے

نیک نامی کے لیے اے نو نہالانِ وطن
غم گسارِ بے کس و مجبور ہونا چاہیے

- شوکت پردیسی

استاد کا نوٹ

الف) اس نظم کی ردیف 'ہونا چاہیے' ہے اور قافیے دور، نور، منظور، مسرور، معمور، دستور، بھرپور اور مجبور ہیں؛ پہلے شعر کے دونوں مصرعے ہم قافیہ ہیں، اس لیے یہ مطلع ہے۔
ب) 'ادراک' یعنی سمجھ، 'ایثار' یعنی دوسروں کے لیے قربانی، 'معمور' یعنی بھرا ہوا اور 'سُرخرُو' یعنی کامیاب اور باعزّت۔
ج) 'نو نہالانِ وطن' یعنی وطن کے بچّے؛ 'غم گسار' وہ ہے جو دوسروں کا دکھ بانٹے۔