NCERT Class 8 Urdu Khayaal Chapter 11 Raat Aur Rail PDF Download

سبق 9: رات اور ریل

پھر چلی ہے ریل اسٹیشن سے لہراتی ہوئی
نیم شب کی خامشی میں زیرِ لب گاتی ہوئی

ڈگمگاتی، جھومتی، سیٹی بجاتی، کھیلتی
وادی و کہسار کی ٹھنڈی ہوا کھاتی ہوئی

تیز جھونکوں میں وہ چھم چھم کا سرودِ دل نشیں
آندھیوں میں مینہ برسنے کی صدا آتی ہوئی

جیسے موجوں کا ترنم جیسے جل پریوں کے گیت
ایک اک لَے میں ہزاروں زمزمے گاتی ہوئی

[تصویر: پہاڑوں اور جنگل کے بیچ دھواں اڑاتی ریل، اپنی درسی کتاب میں دیکھیں]

ٹھوکریں کھا کر، لچکتی، گنگناتی، جھومتی
سرخوشی میں گھنگروؤں کی تال پر گاتی ہوئی

ناز سے ہر موڑ پر کھاتی ہوئی سو پیچ و خم
اک دلہن اپنی ادا سے آپ شرماتی ہوئی

رات کی تاریکیوں میں جھلملاتی، کانپتی
پٹریوں پر دور تک سیماب چھلکاتی ہوئی

جیسے آدھی رات کو نکلی ہو اک شاہی برات
شادیانوں کی صدا سے وجد میں آتی ہوئی

تیز تر ہوتی ہوئی منزل بہ منزل دم بہ دم
رفتہ رفتہ اپنا اصلی روپ دکھلاتی ہوئی

استاد کا نوٹ

الف) اس نظم کے ہر شعر کا دوسرا مصرع 'ہوئی' پر ختم ہوتا ہے، اور اس سے پہلے قافیے آتے ہیں: لہراتی، گاتی، کھاتی، آتی، شرماتی۔
ب) شاعر نے ریل کو کئی چیزوں سے تشبیہ دی ہے، جیسے شرماتی ہوئی دلہن اور آدھی رات کو نکلی شاہی برات۔
ج) 'نیم شب' کا مطلب ہے آدھی رات، 'زیرِ لب' یعنی دھیمی آواز میں، اور 'کہسار' یعنی پہاڑ۔

سینۂ کُہسار پر چڑھتی ہوئی بے اختیار
ایک ناگن جس طرح مستی میں لہراتی ہوئی

اک ستارہ ٹوٹ کر جیسے رواں ہو عرش سے
رفعتِ کہسار سے میدان میں آتی ہوئی

اک بگولے کی طرح بڑھتی ہوئی میدان میں
جنگلوں میں آندھیوں کا زور دکھلاتی ہوئی

جستجو میں منزلِ مقصود کی دیوانہ وار
اپنا سر دھنتی فضا میں بال بکھراتی ہوئی

رینگتی، مڑتی، مچلتی، تلملاتی، ہانپتی
اپنے دل کی آتشِ پنہاں کو بھڑکاتی ہوئی

[تصویر: چاندنی رات میں پہاڑوں کے درمیان بجلی کے تاروں کے نیچے ریل کی پٹری، اپنی درسی کتاب میں دیکھیں]

استاد کا نوٹ

الف) ان اشعار میں ریل کے لیے مزید تشبیہیں دیکھیے: ناگن، ٹوٹا ہوا ستارہ اور بگولا۔
ب) 'سیماب' کا مطلب پارا ہے؛ رات میں چمکتی پٹریوں کو شاعر نے 'سیماب چھلکاتی ہوئی' کہا ہے۔
ج) 'آتشِ پنہاں' یعنی چھپی ہوئی آگ، اور 'رفعت' یعنی بلندی؛ 'سینۂ کُہسار' میں ہ کے اوپر ہمزہ اضافت کی علامت ہے۔