NCERT Class 8 Urdu Khayaal Chapter 10 Zafraan PDF Download

زعفران

(پڑھنے کے لیے)

لفظ زعفران کے لغوی معنی زرد رنگ کے خوش بودار پودے یا پھول کے ہیں۔ یہ دنیا کے مختلف مقامات پر مختلف ناموں سے جانا جاتا ہے۔ اسے عربی زبان میں زعفران، ہندی میں کیسر، فارسی میں زرپران، انگریزی میں Saffron، سنسکرت میں کُنکم اور کشمیری زبان میں کُنگ یا کُنگ پوش کہتے ہیں۔ اسے سُرخ سونا بھی کہا جاتا ہے۔

زعفران ایک قیمتی مصالحہ ہے جو اِس کے پودے کے پھول اور نازک سُرخ ریشوں سے حاصل ہوتا ہے۔ یہ ریشے زیرہ گیر (Stigma) کہلاتے ہیں۔ انھیں پھولوں سے توڑ کر بڑی احتیاط سے خُشک کیا جاتا ہے۔

[تصویر: زعفران کے کھیت میں کھلے ہوئے ارغوانی پھول، اپنی درسی کتاب میں دیکھیں]

استاد کا نوٹ

الف) زعفران کے نام مختلف زبانوں میں یاد رکھیے: عربی میں زعفران، ہندی میں کیسر، فارسی میں زرپران، انگریزی میں Saffron، سنسکرت میں کُنکم اور کشمیری میں کُنگ یا کُنگ پوش۔
ب) زعفران پھول کے سُرخ ریشوں سے حاصل ہوتا ہے جنھیں زیرہ گیر (Stigma) کہتے ہیں۔
ج) قیمتی ہونے کی وجہ سے زعفران کو 'سُرخ سونا' بھی کہا جاتا ہے۔

زعفران کا استعمال مختلف طرح سے ہوتا ہے۔ کھانے پینے کی چیزوں میں خوش بو، ذائقے اور رنگ کے لیے استعمال کیا جاتا ہے۔ اطبّا کے نزدیک زعفران مُقوّی، ذہنی دباؤ کم کرنے اور خون صاف کرنے میں معاون ہے۔ یہ عطر سازی کا بھی ایک اہم جز ہے۔ اس کا استعمال شادی بیاہ اور پوجا پاٹھ کی رسومات میں بھی کیا جاتا ہے۔

زعفران کی پیداوار کے لیے معتدل آب و ہوا، ہلکی دھوپ اور ہلکی سردی ضروری ہے۔ اس کی عمدہ فصل کے لیے چکنی مٹی اور اس میں موجود نامیاتی مادہ بڑی اہمیت رکھتا ہے۔ زعفران کی کھیتی سب سے زیادہ ہمارے ملک میں کشمیر کے ضلع پلواما کے پامپور علاقے میں ہوتی ہے۔ یہاں کی زمین اور آب و ہوا زعفران کے لیے بہت موزوں ہے۔ شمال مشرق کی ریاستوں جیسے اروناچل پردیش، سکم، میگھالیہ اور منی پور وغیرہ میں بھی اس کی پیداوار کو فروغ حاصل ہے۔

[تصویر: ٹوکری میں زعفران کے پھول، اپنی درسی کتاب میں دیکھیں]

وادئ کشمیر میں زعفران کے پھولوں کو اکٹھا کرتے وقت 'جشنِ زعفران' کا انعقاد کیا جاتا ہے۔ اس جشن میں سیاح اور مقامی لوگ شام میں لوک موسیقی و گائیکی کے ساتھ زعفرانی قہوہ سے لطف اندوز ہوتے ہیں۔

- ادارہ

استاد کا نوٹ

الف) ہمارے ملک میں زعفران کی سب سے زیادہ کھیتی کشمیر کے ضلع پلواما کے پامپور علاقے میں ہوتی ہے۔
ب) زعفران کے لیے ضروری حالات: معتدل آب و ہوا، ہلکی دھوپ، ہلکی سردی اور نامیاتی مادے والی چکنی مٹی۔
ج) 'اطبّا' لفظ 'طبیب' کی جمع ہے، یعنی حکیم یا معالج؛ 'مُقوّی' کا مطلب ہے طاقت دینے والا۔