NCERT Class 8 Urdu Khayaal Chapter 09 Namdev Mali PDF Download

سبق 8: نام دیو مالی

نام دیو 'مقبرۂ رابعہ درّانی' اورنگ آباد (دکن) کے باغ میں مالی تھا۔ مقبرے کا باغ میری نگرانی میں تھا۔ میرے رہنے کا مکان بھی باغ کے احاطے ہی میں تھا۔ میں نے اپنے بنگلے کے سامنے چمن بنانے کا کام نام دیو کے سپرد کیا۔ میں اندر کمرے میں کام کرتا رہتا تھا۔ میری میز کے سامنے بڑی سی کھڑکی تھی۔ اس میں سے چمن صاف نظر آتا تھا۔ لکھتے لکھتے کبھی نظر اٹھا کر دیکھتا، تو نام دیو کو ہمہ تن اپنے کام میں مصروف پاتا۔ بعض دفعہ اس کی حرکتیں دیکھ کر بہت تعجب ہوتا۔ مثلاً کیا دیکھتا ہوں کہ نام دیو ایک پودے کے سامنے بیٹھا اس کا تھانولا صاف کر رہا ہے۔ تھانولا صاف کر کے حوض سے پانی لیا اور آہستہ آہستہ ڈالنا شروع کیا۔ پانی ڈال کر ڈول درست کیا اور ہر رخ سے پودے کو مڑ مڑ کر دیکھا۔ پھر الٹے پاؤں پیچھے ہٹ کر اسے دیکھنے لگا۔ دیکھتا جاتا تھا اور مسکراتا اور خوش ہوتا تھا۔ یہ دیکھ کر مجھے حیرت بھی ہوئی اور خوشی بھی۔ کام اسی وقت ہوتا ہے جب اس میں لذت آنے لگے۔ بے مزہ کام، کام نہیں بے گار ہے۔

[تصویر: کھڑکی سے باغ میں کام کرتے مالی کو دیکھتا شخص، اپنی درسی کتاب میں دیکھیں]

استاد کا نوٹ

الف) کہانی 'میں' کی زبانی بیان ہوئی ہے: کہنے والا باغ کا نگران ہے اور نام دیو مالی کو اپنی کھڑکی سے دیکھتا ہے۔
ب) باغ کی جگہ یاد رکھیے: مقبرۂ رابعہ درّانی، اورنگ آباد (دکن)۔
ج) 'ہمہ تن' کا مطلب ہے پوری طرح؛ 'بے گار' یعنی ایسا کام جو بے دلی یا زبردستی سے کیا جائے۔

اب مجھے اس سے دل چسپی ہونے لگی۔ یہاں تک کہ بعض وقت اپنا کام چھوڑ کر اسے دیکھا کرتا۔ مگر اسے خبر نہ ہوتی کہ کوئی دیکھ رہا ہے یا اس کے آس پاس کیا ہو رہا ہے۔ وہ اپنے کام میں مگن رہتا۔ اس کی کوئی اولاد نہ تھی۔ وہ اپنے پودوں اور پیڑوں ہی کو اپنی اولاد سمجھتا تھا اور اولاد کی طرح ان کی پرورش اور نگہداشت کرتا۔ ان کو سبز اور شاداب دیکھ کر ایسا ہی خوش ہوتا جیسے ماں اپنے بچوں کو دیکھ کر خوش ہوتی ہے۔ وہ ایک ایک پودے کے پاس بیٹھتا، ان کو پیار کرتا، جُھک جُھک کے دیکھتا اور ایسا معلوم ہوتا گویا ان سے چپکے چپکے باتیں کر رہا ہے۔ جیسے جیسے وہ بڑھتے، پھولتے پھلتے اس کا دل بھی بڑھتا اور پھولتا پھلتا تھا، ان کو توانا دیکھ کر اس کے چہرے پر خوشی کی لہر دوڑ جاتی۔ کبھی کسی پودے کو اتفاق سے کیڑا لگ جاتا یا کوئی اور روگ پیدا ہو جاتا تو اسے بڑی فکر ہوتی۔ بازار سے دوائیں لاتا۔ باغ کے داروغہ یا مجھ سے کہہ کر منگواتا۔ دن بھر اسی میں لگا رہتا اور اُس پودے کی ایسی سیوا کرتا جیسے کوئی ہمدرد اور نیک دل ڈاکٹر اپنے عزیز بیمار کی کرتا ہے۔ ہزار جتن کرتا اور اسے بچا لیتا اور جب تک وہ تندرست نہ ہو جاتا اسے چین نہ آتا۔ اس کے لگائے ہوئے پودے ہمیشہ پروان چڑھے اور کبھی کوئی پیڑ ضائع نہ ہوا۔

[تصویر: پودوں کو پانی دیتا ہوا نام دیو، اپنی درسی کتاب میں دیکھیں]

استاد کا نوٹ

الف) مصنف نے دو تشبیہیں دی ہیں: نام دیو پودوں کو دیکھ کر ایسے خوش ہوتا 'جیسے ماں اپنے بچوں کو دیکھ کر'، اور بیمار پودے کی سیوا 'جیسے نیک دل ڈاکٹر اپنے عزیز بیمار کی'۔
ب) 'تھانولا' پودے کی جڑ کے گرد بنایا گیا گڑھا ہے جس میں پانی ڈالا جاتا ہے۔
ج) 'پروان چڑھنا' محاورہ ہے، یعنی اچھی طرح بڑھنا اور پلنا؛ 'روگ' کا مطلب ہے بیماری۔