NCERT Class 8 Urdu Khayaal Chapter 08 Kaziranga National Park PDF Download

سبق 7: کازی رنگا نیشنل پارک

انسانی آبادی مسلسل بڑھ رہی ہے، جس کے سبب نئی نئی بستیاں بسانے کی ضرورت پیش آ رہی ہے۔ اس ضرورت کو پورا کرنے کے لیے جنگلات کاٹنے شروع کر دیے گئے۔ جنگلات کم ہوئے تو آب و ہوا اور ماحولیات کا توازن بگڑنے لگا۔ انسان کو اپنی ناسمجھی کے باعث نقصانات کا اندازہ ہوا تو جنگلوں کو محفوظ کیے جانے کی فکر ہوئی تا کہ ان میں رہنے والے جانور اور پیڑ پودوں کی بھی حفاظت کی جا سکے اور ماحولیاتی توازن بھی نہ بگڑنے دیا جائے۔ حکومت کے ذریعے بنائے قوانین کی مدد سے جنگلوں کے تحفظ کو یقینی بنایا گیا۔ اِن محفوظ جنگلات کو نیشنل ریزرو پارک کہا جاتا ہے۔ ان پارکوں میں پیڑ پودوں اور جانوروں کو وہاں پہلے سے موجود قدرتی ماحول میں قائم رکھا جاتا ہے۔ ان میں کسی قسم کی تبدیلی کی اجازت نہیں ہوتی۔ البتہ تفریحی سیاحت یا تحقیقی مقاصد کے لیے داخلہ کی اجازت ہوتی ہے۔

ہندوستان میں اس وقت سو سے زیادہ نیشنل ریزرو پارک ہیں۔ ان پارکوں میں اترا کھنڈ میں واقع جم کاربٹ پارک، راجستھان کا رنتھمبور، گجرات کا گیر جنگل، مغربی بنگال کا سندر بن اور آسام کا کازی رنگا نیشنل پارک بہت مشہور ہیں۔

[تصویر: پانی کے پاس گینڈے، اپنی درسی کتاب میں دیکھیں]

استاد کا نوٹ

الف) محفوظ جنگلات کو 'نیشنل ریزرو پارک' کہا جاتا ہے؛ ان میں داخلے کی اجازت صرف تفریحی سیاحت یا تحقیقی مقاصد کے لیے ہوتی ہے۔
ب) مشہور پارکوں کو ان کی ریاست کے ساتھ یاد رکھیے: جم کاربٹ (اترا کھنڈ)، رنتھمبور (راجستھان)، گیر (گجرات)، سندر بن (مغربی بنگال) اور کازی رنگا (آسام)۔
ج) 'توازن' کا مطلب ہے برابری یا ٹھیک حالت؛ جنگل کم ہونے سے ماحولیات کا توازن بگڑنے لگا۔

[تصویر: آبشار کے پاس دریا میں ہاتھی، اپنی درسی کتاب میں دیکھیں]

کازی رنگا نیشنل ریزرو پارک ہمارے ملک کے بڑے اور مشہور پارکوں میں سے ایک ہے۔ یہ پارک آسام کے گولاگھاٹ اور نوگاؤں ضلعوں کے درمیان پھیلا ہوا ہے۔ یہ ہمالیہ کی ترائی میں مشرقی سرے کے گرم اور مرطوب آب و ہوا والے علاقہ میں واقع ہے۔ اس پارک میں جنگلی جانوروں اور پرندوں کی بہت سی قسمیں پائی جاتی ہیں خصوصاً ایک سینگ والے گینڈے یہاں بڑی تعداد میں پائے جاتے ہیں۔ اس کے علاوہ قدرتی مناظر کا حسن بھی چاروں طرف بکھرا پڑا ہے۔

کازی رنگا نیشنل پارک کا قیام 1905 میں انگریز وائسرائے لارڈ کرزن کے ہاتھوں عمل میں آیا۔ لارڈ کرزن نے ڈھائی سو کلومیٹر کے رقبے کو محفوظ کر کے یہاں شکار پر پابندی لگا دی تھی۔ صرف سیّاحوں کو اجازت نامہ جاری کر کے گھومنے کی اجازت تھی۔ 1974 میں حکومت کی جانب سے اسے نیشنل پارک کا درجہ دیا گیا اور 1985 میں یونیسکو (UNESCO) نے اسے عالمی ثقافتی ورثہ (World Heritage Site) کا درجہ دیا۔ یہ قومی پارک برہم پتر ندی کے کنارے واقع ہے۔ برہم پتر میں تقریباً ہر سال زبردست سیلاب آتا ہے جس سے پارک کے تین چوتھائی حصّہ میں پانی بھر جاتا ہے۔ اس سیلاب کی وجہ سے بڑی تعداد میں جانوروں کی جانیں تلف ہو جاتی ہیں۔ پارک کے جانوروں کی جان بچانے کے لیے اس پارک کی سرحد پر ایک اور نیشنل پارک بنایا گیا جس کا نام مانس (Manas) ہے۔ بارش کے دنوں میں جانوروں کو اس پارک میں منتقل کر دیا جاتا ہے۔ یہ پارک کازی آنگ (Kazi Aang) پہاڑ کے قریب واقع ہے۔ سیلاب کی صورت حال ختم ہونے کے بعد یہ جانور واپس نیچے آ جاتے ہیں۔

استاد کا نوٹ

الف) کازی رنگا کی تاریخیں ترتیب سے یاد رکھیے: 1905 میں قیام (لارڈ کرزن)، 1974 میں نیشنل پارک کا درجہ، 1985 میں یونیسکو کا عالمی ثقافتی ورثہ۔
ب) کازی رنگا کی خاص پہچان ایک سینگ والا گینڈا ہے۔
ج) 'مرطوب' کا مطلب ہے نمی والا؛ 'تلف ہونا' یعنی ضائع ہونا یا ختم ہو جانا۔