NCERT Class 8 Urdu Khayaal Chapter 07 Teen Sawal PDF Download

سبق 6: تین سوال

ایک بار ایک بادشاہ کے دل میں خیال آیا کہ اگر اُسے پہلے سے ہی معلوم ہو جایا کرے کہ کسی کام کے شروع کرنے کا صحیح وقت کیا ہے، وہ کون سے مناسب لوگ ہیں جن کی رائے پر بھروسہ کیا جائے اور وہ کہ جن سے بچا جائے۔ سب سے بڑھ کر یہ کہ اگر اُسے یہ پہلے سے معلوم ہو جائے کہ وہ کون سا کام ہے جس کا کرنا سب سے زیادہ ضروری ہے تو اسے کبھی ناکامی کا منھ نہ دیکھنا پڑے۔

[تصویر: دربار میں تخت پر بیٹھا بادشاہ اور درباری، اپنی درسی کتاب میں دیکھیں]

یہ خیال دل میں آتے ہی بادشاہ نے پوری سلطنت میں منادی کرا دی کہ وہ اُس شخص کو ایک بڑا انعام دے گا جو اُسے یہ بتا سکے کہ ہر کام کے شروع کرنے کا صحیح وقت کیا ہے؟ بہت اہم لوگ کون ہیں؟ اور سب سے زیادہ ضروری کام کیا ہے جو اُسے کرنا چاہیے۔

بادشاہ کے پاس بہت سے لوگ آئے لیکن اُن سب نے بادشاہ کے سوالات کے مختلف جوابات دیے۔ جوابات مختلف ہونے کی وجہ سے بادشاہ ان میں سے کسی سے اتفاق نہ کر سکا اور نہ اس نے کسی کو انعام دیا۔ لیکن چوں کہ وہ اپنے سوالوں کے جوابات جاننے کے لیے اب بھی فکر مند تھا، اس لیے اُس نے طے کیا کہ وہ ایک سادھو سے مشورہ کرے گا جو اپنی سوجھ بوجھ کی وجہ سے سلطنت کے کونے کونے میں مشہور تھا۔

وہ سادھو ایک جنگل میں رہتا تھا جس کے باہر کبھی نہیں گیا تھا۔ وہ عام آدمیوں کے علاوہ کسی سے نہیں ملتا تھا۔ چنانچہ بادشاہ نے معمولی کپڑے پہنے اور سادھو کی کُٹیا سے پہلے ہی وہ اپنے گھوڑے سے اُتر کر اور اپنے سپاہیوں کو پیچھے چھوڑ کر سادھو سے ملنے کے لیے اکیلا چل پڑا۔

[تصویر: کُٹیا کے سامنے زمین کھودتا سادھو اور اس کی طرف آتا بادشاہ، اپنی درسی کتاب میں دیکھیں]

استاد کا نوٹ

الف) بادشاہ کے تین سوال ترتیب سے یاد رکھیے: کام شروع کرنے کا صحیح وقت، سب سے اہم لوگ، اور سب سے ضروری کام۔
ب) 'منادی کرانا' کا مطلب ہے اعلان کرانا۔
ج) بادشاہ کو کسی جواب پر اتفاق کیوں نہ ہوا؟ سبق کے مطابق سب لوگوں کے جوابات مختلف تھے۔

بادشاہ قریب پہنچا تو دیکھا کہ اُس وقت سادھو اپنی کُٹیا کے سامنے زمین کی کھدائی کر رہا تھا۔ بادشاہ کو دیکھتے ہی اس نے اُسے سلام کیا اور کھودتا رہا۔ سادھو دُبلا پتلا اور کمزور تھا۔ ہر بار جب وہ اپنا پھاوڑا زمین پر چلاتا، بہت تھوڑی مٹی کھود پاتا اور بُری طرح ہانپنے لگتا۔

بادشاہ اس کے پاس گیا اور کہا، "سادھو مہاراج، ہم آپ کے پاس تین سوالوں کے جواب لینے آئے ہیں۔ ایک یہ کہ میں یہ کیسے جان سکتا ہوں کہ کام کرنے کا صحیح وقت کیا ہے؟ دوم یہ کہ وہ کون لوگ ہیں جن کی مجھے بہت ضرورت ہے تا کہ میں دوسروں کے مقابلے میں ان پر زیادہ توجہ دے سکوں؟ تیسرا یہ کہ وہ کون سے معاملات ہیں جو بہت ضروری ہیں اور جن پر مجھے فوراً توجہ کرنی چاہیے؟"

سادھو نے بادشاہ کی بات سنی لیکن کوئی جواب نہیں دیا۔ اور پھر زمین کھودنے لگا۔

"آپ تھک گئے ہیں۔"

بادشاہ نے کہا، "مجھے پھاوڑا دیجیے، میں تھوڑی دیر آپ کا کام کروں گا۔"

"شکریہ" سادھو نے کہا اور بادشاہ کو پھاوڑا دے کر زمین پر بیٹھ گیا۔

استاد کا نوٹ

الف) بادشاہ سادھو سے ملنے عام آدمی بن کر گیا؛ اس نے معمولی کپڑے پہنے اور سپاہیوں کو پیچھے چھوڑ دیا، کیوں کہ سادھو صرف عام آدمیوں سے ملتا تھا۔
ب) 'پھاوڑا' زمین کھودنے کا اوزار ہے اور 'ہانپنا' یعنی تھکن سے تیز تیز سانس لینا۔
ج) سادھو کے سامنے بادشاہ نے اپنے سوال 'ایک یہ کہ ... دوم یہ کہ ... تیسرا یہ کہ' کہہ کر ترتیب سے پوچھے ہیں۔