NCERT Class 8 Urdu Khayaal Chapter 12 Hazir Jawab PDF Download

سبق 10: حاضر جواب

بہت پرانی بات ہے، آبو نام کا ایک شخص تھا جو بہت عقل مند تھا۔ ایک دن گھومتے پھرتے وہ ملک کی راجدھانی میں واقع شاہی محل پہنچ گیا۔ وہ ملازمت کے لیے پریشان تھا۔ بادشاہ کے دربار پہنچ کر اُس نے گزارش کی: "بادشاہ سلامت! میں بہت پریشان ہوں، مجھے کوئی کام دے دیجیے۔ آپ مجھے جو بھی کام دیں گے، نہایت ایمان داری اور لگن سے انجام دوں گا اور آپ کا فرماں بردار بن کر رہوں گا۔"

بادشاہ نے اس کی درخواست قبول کی اور اسے پہرہ دینے کے کام پر لگا دیا۔ وہ اپنی حاضر جوابی اور خوش مزاجی کی وجہ سے بہت جلد مقبول ہو گیا۔ بادشاہ بھی خوش ہوا اور خاص طور پر اپنے محل کی پہرہ داری اس کے سپرد کر دی۔ ترقی پا کر آبو کی شان بڑھ گئی۔

ایک دن بادشاہ نے اُس سے رازدارانہ انداز میں کہا: "آبو! میں ایک ضروری کام سے باہر جا رہا ہوں۔ اس راز کی کسی کو خبر نہ ہونے پائے۔ خیال رہے کہ میری واپسی تک کسی کو محل میں جانے نہ دینا۔"

[تصویر: دربار میں بادشاہ کے سامنے کھڑا آبو، اپنی درسی کتاب میں دیکھیں]

"حضور آپ مطمئن رہیں۔ مَیں محل کے دروازے کی دن رات نگرانی کروں گا اور کسی کو بھی آپ کے جانے کی خبر نہ دوں گا۔"

استاد کا نوٹ

الف) کہانی کا مرکزی کردار آبو ہے، جو اپنی حاضر جوابی اور خوش مزاجی کی وجہ سے جلد مقبول ہو گیا۔
ب) بادشاہ کے دو حکم یاد رکھیے: اس کے جانے کی کسی کو خبر نہ ہو، اور واپسی تک کسی کو محل میں جانے نہ دیا جائے۔
ج) 'حاضر جواب' اسے کہتے ہیں جو فوراً اور موقع کے مطابق جواب دے؛ 'فرماں بردار' یعنی حکم ماننے والا۔

آبو، دن رات دروازے کی سخت نگرانی کرنے لگا۔ ایک رات ہر طرف چاندنی بکھری ہوئی تھی، پونم کا تہوار تھا۔ لوگ ناچ گا رہے تھے اور خوشیاں منا رہے تھے۔ آبو کا دل بھی ناچنے اور گانے کے لیے مچلنے لگا لیکن وہ بادشاہ کے حکم کی خلاف ورزی نہیں کر سکتا تھا۔

تب اُسے ایک ترکیب سوجھی۔ اُس نے دروازے کی تمام کیلیں اور قلابے نکال لیے۔ ان دروازوں اور اپنے ہتھیاروں کو ایسی جگہ چھپا کر رکھ دیا کہ کسی کی نظر نہ پڑے۔ پھر وہ لوگوں میں آ کر ناچنے، گانے لگا۔ صبح ہونے تک وہ ناچتا گاتا رہا اور پھر محل واپس آ گیا۔ نکالے ہوئے دروازے کو اس نے اپنی جگہ پر لگا دیا اور پہرہ دینے لگا۔ لیکن آبو اس بات سے بے خبر تھا کہ رات میں چور محل میں گھس کر تمام سامان چرا لے گئے تھے۔ اگلے دن جب بادشاہ واپس آیا اور آبو کو دروازے پر پہرہ دیتے دیکھا تو بے حد خوش ہوا۔ لیکن جب وہ محل میں داخل ہوا تو اسے بڑی حیرت ہوئی۔ وہ نہایت غصّے میں باہر نکلا اور گرج دار آواز میں بولا:

"کیا تم میرے جانے کے بعد برابر پہرہ دے رہے تھے؟"

"جی حضور!"

"پھر محل میں چوری کیسے ہوئی؟" بادشاہ نے گرج کر پوچھا۔

[تصویر: قلعے کے دروازے پر آبو سے سوال کرتا ناراض بادشاہ، اپنی درسی کتاب میں دیکھیں]

استاد کا نوٹ

الف) واقعات کی ترتیب دیکھیے: آبو نے دروازہ اتار کر چھپایا، رات بھر ناچا گایا، صبح دروازہ واپس لگایا، مگر اسی رات محل میں چوری ہو گئی۔
ب) 'پونم' کا مطلب ہے پورے چاند کی رات؛ 'قلابے' دروازے کے وہ کُنڈے ہیں جن پر دروازہ گھومتا ہے۔
ج) 'خلاف ورزی' یعنی حکم یا قانون نہ ماننا؛ 'گرج دار آواز' یعنی بہت اونچی اور غصّے والی آواز۔