NCERT Class 8 Urdu Khayaal Chapter 21 Neeti Shatakam PDF Download

نیتی شتکم

(پڑھنے کے لیے)

علم کے زیور سے قائم آدمی کی شان ہے
دولتِ محفوظ ہے، ہر عیش کا سامان ہے
گیان، راجہ ہے، رشی ہے، دیوتا، بھگوان ہے
گیان سے محروم انساں واقعی حیوان ہے

ہے حق پرستوں کا ہر دم شعار
مصیبت سے لڑتے ہیں مردانہ وار
کسی کا وہ احسان لیتے نہیں
نہ مانگیں کسی سے وہ ہرگز اُدھار

[تصویر: کتابیں پڑھتے اور لیپ ٹاپ پر کام کرتے بچے، اپنی درسی کتاب میں دیکھیں]

استاد کا نوٹ

الف) پہلے بند میں 'علم' اور 'گیان' ایک ہی معنی میں آئے ہیں؛ شاعر کے مطابق علم آدمی کی شان اور 'دولتِ محفوظ' ہے۔
ب) پہلے بند کے چاروں مصرعے 'ان ہے' پر ختم ہوتے ہیں: شان، سامان، بھگوان، حیوان۔
ج) 'شعار' یعنی طریقہ یا عادت، 'حق پرست' یعنی سچائی پر چلنے والا، اور 'مردانہ وار' یعنی بہادری سے۔

تشدّد، نہ حِرص و ہوس سے ہو کام
کرو بے کسوں کی مدد صبح و شام
ہر اک فرد و ملّت کے ہو خیر خواہ
سبھی مذہبوں کا کرو احترام

اک بوند گر کے تپتے توے پر ہوئی فنا
اک بوند جا کے سِیپ میں موتی ہے بے بہا
اک بوند سے ہے پھول کے چہرے پہ آب و تاب
صحبت جُدا جُدا تھی تو قسمت جُدا جُدا

دودھ سے پانی کی ہو جاتی ہے یاری پیاری
آتی ہے پانی میں بھی دودھ کی رنگت ساری
دودھ کھولا ہے تو پانی ہی جلا ہے پہلے
یوں ہی اچھّوں میں ہوا کرتی ہے اچھّی یاری

- بھرتری ہری، مترجم امتیاز الدین خاں

(بھرتری ہری کا شمار سنسکرت کے عظیم شاعروں میں ہوتا ہے۔ کئی صدیاں گزر جانے کے بعد بھی ان کے کلام سے دل چسپی برقرار ہے۔ اردو کے متعدد شعرا نے ان کے کلام کے منظوم ترجمے کیے ہیں۔ یہاں معروف شاعر و ادیب امتیاز الدین خاں کے بھرتری ہری کے بعض شلوکوں کے منظوم ترجمے پیش کیے گئے ہیں۔)

[تصویر: سیپ میں موتی، ابلتا دودھ، اور بزرگ کا ہاتھ تھامے بچہ، اپنی درسی کتاب میں دیکھیں]

استاد کا نوٹ

الف) یہ سنسکرت شاعر بھرتری ہری کے شلوکوں کا اردو منظوم ترجمہ ہے، جو امتیاز الدین خاں نے کیا ہے؛ 'منظوم ترجمہ' یعنی نظم کی شکل میں ترجمہ۔
ب) بوند والے بند کی مثال سمجھیے: ایک ہی بوند توے پر فنا ہوئی، سیپ میں موتی بنی اور پھول پر آب و تاب؛ فرق صرف 'صحبت' کا تھا۔
ج) 'بے بہا' یعنی بہت قیمتی، 'حِرص و ہوس' یعنی لالچ، 'بے کس' یعنی بے سہارا، اور 'خیر خواہ' یعنی بھلا چاہنے والا۔