NCERT Class 6 Urdu Khayaal Chapter 09 Ek Pauda Aur Ghaas PDF Download

سبق 9: ایک پودا اور گھاس

اتفاقاً ایک پودا اور گھاس
باغ میں دونوں کھڑے ہیں پاس پاس
گھاس کہتی ہے کہ اے میرے رفیق
کیا انوکھا اس جہاں کا ہے طریق
ہے ہماری اور تمھاری ایک ذات
ایک قدرت سے ہے دونوں کی حیات
مٹّی اور پانی ہوا اور روشنی
واسطے دونوں کے یکساں ہے بنی
تجھ پہ لیکن ہے عنایت کی نظر
پھینک دیتے ہیں مجھے جڑ کھود کر
سر اٹھانے کی مجھے فرصت نہیں
اور ہوا کھانے کی بھی رخصت نہیں
کون دیتا ہے مجھے یاں پھیلنے
کھا لیا گھوڑے گدھے یا بیل نے

[تصویر: باغ میں پودے اور گھاس کے پاس کھیلتی لڑکیاں اور گھاس اکھاڑتا آدمی، اپنی درسی کتاب میں دیکھیں]

تجھ پہ منہ ڈالے جو کوئی جانور
اس کی لی جاتی ہے ڈنڈے سے خبر
اولے پالے سے بچاتے ہیں تجھے
کیا ہی عزت سے بڑھاتے ہیں تجھے
چاہتے ہیں تجھ کو سب کرتے ہیں پیار
کچھ پتا اِس کا بتا اے دوست دار
اُس سے پودے نے کہا یوں سر ہلا
گھاس! سب بے جا ہے تیرا یہ گِلا
مجھ میں اور تجھ میں نہیں کچھ بھی تمیز
صرف سایہ اور میوہ ہے عزیز
فائدہ اک روز مجھ سے پائیں گے
سایے میں بیٹھیں گے اور پھل کھائیں گے
ہے یہاں عزّت کا سہرا اُس کے سر
جس سے پہنچے نفع سب کو بیشتر

- اسمٰعیل میرٹھی

[تصویر: پھل دار درخت کے سایے میں بیٹھی لڑکیاں، اپنی درسی کتاب میں دیکھیں]

استاد کا نوٹ

الف) یہ نظم ایک مکالمہ ہے: پہلے گھاس شکایت کرتی ہے اور پھر پودا اسے جواب دیتا ہے؛ پودے کا جواب 'اُس سے پودے نے کہا' سے شروع ہوتا ہے۔
ب) اس نظم میں ہر شعر کے دونوں مصرعے ہم قافیہ ہیں، جیسے گھاس/پاس، رفیق/طریق، ذات/حیات۔
ج) یہ نظم اسمٰعیل میرٹھی کی ہے؛ 'گِلا' یعنی شکایت، 'میوہ' یعنی پھل، اور 'نفع' یعنی فائدہ۔

لفظ و معنی

استاد کا نوٹ

الف) 'رفیق' اور 'دوست دار' دونوں دوست کے معنی میں آئے ہیں؛ گھاس پودے کو انھی ناموں سے پکارتی ہے۔
ب) 'عزت کا سہرا سر ہونا' محاورہ ہے، یعنی عزت کا حق دار ہونا۔
ج) 'یاں' پرانا لفظ ہے جس کا مطلب ہے 'یہاں'؛ شاعری میں ایسے مختصر لفظ وزن کے لیے آتے ہیں۔