NCERT Class 6 Urdu Khayaal Chapter 05 Veer Abdul Hameed PDF Download

سبق 5: ویر عبدالحمید

ایک فوجی کے لیے اپنے ملک کی حفاظت کرنا سب سے بڑی ذمہ داری ہوتی ہے، وہ اپنی جان سے زیادہ اپنے ملک سے محبت کرتا ہے۔ ملک کی عظمت اور شان کے لیے مر مٹنے کو تیار رہتا ہے۔ کئی ایسے مواقع آئے کہ ہمارے ملک کے عظیم جاں باز فوجیوں نے ملک کی حفاظت کی خاطر اپنی جانیں تک قربان کر دیں۔ وطن پر اپنی جان نچھاور کرنے والوں میں ایک نام ویر عبدالحمید کا بھی ہے۔ ان کی پیدائش 1 جولائی 1933 کو اتر پردیش میں ضلع غازی پور کے گاؤں دھاموپور میں ہوئی۔ ان کے والد کا نام محمد عثمان اور والدہ کا نام سکینہ بیگم تھا۔

ان کا تعلق غریب گھرانے سے تھا۔ ان کے والد گزر بسر کے لیے کپڑوں کی سلائی کا کام کیا کرتے تھے۔ عبدالحمید بھی اپنے والد کے کام میں ان کی مدد کیا کرتے تھے۔ انھیں بچپن سے ہی کُشتی لڑنے، ندی میں تیرنے اور غلیل سے نشانہ لگانے کا شوق تھا۔

ایک بار ان کے گھر کے قریب کی ندی میں سیلاب آ گیا۔ اس سیلاب سے غازی پور ضلع کے پدم پور اور آس پاس کے علاقے پانی میں ڈوب گئے۔ اس وقت عبدالحمید نے اپنی جان کی بازی لگا کر کئی لوگوں کو ڈوبنے سے بچا لیا۔ وہ بچپن سے ہی جیالے تھے کسی کے ساتھ ناانصافی ہوتے دیکھنا ان کو سخت ناگوار تھا۔ ایک بار ان کے گاؤں کے زمین دار نے ایک غریب کسان کی فصل کو زبردستی ہتھیانے کی کوشش کی۔ زمین دار نے اپنے آدمیوں کو کٹی ہوئی فصل لوٹ کر لانے کو بھیجا۔ عبدالحمید اس زیادتی کو برداشت نہ کر سکے۔ انھوں نے تنِ تنہا ان سب کا مقابلہ کیا اور کسان کی فصل کو بچا لیا۔

[تصویر: فوجی وردی میں ویر عبدالحمید، اپنی درسی کتاب میں دیکھیں]

استاد کا نوٹ

الف) ویر عبدالحمید کی پیدائش: 1 جولائی 1933، گاؤں دھاموپور، ضلع غازی پور (اتر پردیش)؛ والد محمد عثمان اور والدہ سکینہ بیگم۔
ب) بچپن کے شوق یاد رکھیے: کُشتی لڑنا، ندی میں تیرنا اور غلیل سے نشانہ لگانا۔
ج) 'جیالا' یعنی بہادر، 'ناگوار' یعنی ناپسند، 'تنِ تنہا' یعنی اکیلے، اور 'جان کی بازی لگانا' یعنی جان خطرے میں ڈالنا۔

ویر عبدالحمید لوگوں سے ہی نہیں اپنے وطن سے بھی بہت محبت کرتے تھے۔ اسی حب الوطنی کے جذبے سے سرشار ہو کر انھوں نے ہندوستانی فوج میں شامل ہونے کا ارادہ کیا۔ چنانچہ 27 دسمبر 1953 کو فوج میں ان کی بھرتی ہوئی۔ ٹریننگ کے بعد انھیں نصیر آباد چھاؤنی بھیج دیا گیا۔ یہاں فوجی تربیت دینے والے افسران اُن کی فرض شناسی سے بہت خوش رہتے تھے۔

[تصویر: ویر عبدالحمید کا مجسمہ، اپنی درسی کتاب میں دیکھیں]

استاد کا نوٹ

الف) عبدالحمید 27 دسمبر 1953 کو فوج میں بھرتی ہوئے اور ٹریننگ کے بعد نصیر آباد چھاؤنی بھیجے گئے۔
ب) 'حب الوطنی' یعنی وطن سے محبت، اور 'فرض شناسی' یعنی اپنے فرض کو سمجھنا اور ادا کرنا۔
ج) 'چھاؤنی' وہ جگہ ہے جہاں فوج رہتی ہے؛ 'سرشار' یعنی پوری طرح بھرا ہوا۔