NCERT Class 6 Urdu Khayaal Chapter 02 Chidiya Ka Ghonsla PDF Download

سبق 2: چڑیا کا گھونسلا

درختوں کے پتّے جھڑنا شروع ہو گئے تھے۔ رات میں ہلکی ہلکی ٹھنڈک رہنے لگی تھی۔ سردیوں کی آمد آمد تھی۔ ننھی چڑیا نے سوچا کہ گرمیاں تو ہنس کھیل کر گزار لیں، اب سردیوں کی کچھ فکر کرنی چاہیے، اگر گھونسلا نہیں ہوا تو سردیوں میں ٹھٹھر کر رہ جاؤں گی۔ آخر ایک روز اس نے گھونسلا بنانا شروع کیا۔ چھوٹی سی تو تھی، گھونسلا بنانا کیا جانے! جو کچھ سن رکھا تھا اس کے مطابق اِدھر اُدھر سے دو چار تنکے جمع کیے اور ایک درخت کی شاخ پر پتّوں کے درمیان انھیں رکھ کر سوچنے لگی کہ اب کیا کروں؟ کس سے پوچھوں کہ ان تنکوں کو کیسے جوڑا جائے؟ اسی سوچ میں تھی کہ اتنے میں ایک ہُدہُد اُسی درخت پر آ بیٹھا۔ سلام دعا کے بعد ہُدہُد کہنے لگا!

"کہو ننّھی منّی، یہ تنکے کیوں لیے بیٹھی ہو؟"

"سوچ رہی ہوں ایک گھونسلا بنا لوں۔ سردیاں آ رہی ہیں، چند تنکے تو جمع کر لیے ہیں، اب انھیں جوڑنے کی فکر ہے۔" ننّھی چڑیا نے جواب دیا۔

اُس کی بات سن کر ہُدہُد قہقہہ مار کر ہنسا اور بولا: "اری بے وقوف! بھلا تنکوں سے کہیں گھونسلا بنتا ہے۔ گھونسلا تو درخت کو کھود کر بنایا جاتا ہے۔"

[تصویر: درخت کی شاخ پر بیٹھے چڑیا اور ہُدہُد، اپنی درسی کتاب میں دیکھیں]

استاد کا نوٹ

الف) کہانی کے دو کردار ہیں: ننّھی چڑیا اور ہُدہُد؛ چڑیا سردیوں سے پہلے گھونسلا بنانا چاہتی ہے۔
ب) 'آمد آمد' کا مطلب ہے آنے ہی والا ہونا؛ 'ٹھٹھرنا' یعنی سردی سے کانپنا۔
ج) 'قہقہہ مار کر ہنسنا' یعنی زور سے ہنسنا؛ ہُدہُد چڑیا کی بات پر اسی طرح ہنسا۔

چڑیا حیرت سے بولی! "درخت کو کھود کر! درخت کو کھود کر بھلا کیسے؟"

"لو بھلا یہ کون سا مشکل کام ہے۔" ہُدہُد نے کہا اور یہ کہہ کر اُس نے اپنی لمبی اور نوک دار چونچ درخت پر بار بار مارنی شروع کی۔ کھٹ۔ کھٹ۔ کھٹ اس کی تیز چونچ لگنے سے آواز پیدا ہوئی اور درخت سے لکڑی کا تھوڑا سا برادہ نکل آیا۔ درخت کے تنے پر چھوٹا گڑھا پڑ گیا۔ "دیکھا! اِس طرح کھودتے رہنے سے بڑی سی کھوہ بن جاتی ہے۔ میں تو اسی طرح گھونسلا بناتا ہوں۔ ہم سارے ہُدہُد یہی کرتے ہیں۔ درختوں کے تنوں کو کھود کر ان میں رہتے ہیں، تم بھی یہی کرو۔"

[تصویر: درخت کے تنے پر چونچ مارتا ہُدہُد اور حیران چڑیا، اپنی درسی کتاب میں دیکھیں]

یہ کہہ کر ہُدہُد تو اُڑ گیا مگر ننّھی چڑیا کو پریشان کر گیا۔ وہ سوچنے لگی کہ اگر ہُدہُد کی بات مان لوں تو اس جیسی تیز چونچ کہاں سے لاؤں جس سے درخت کا تنا کھود ڈالوں؟ آخر اس نے سوچا کہ آزمانے میں حرج کیا ہے اور اپنی چونچ درخت پر مارنے لگی لیکن اس کی چھوٹی سی چونچ سے گڑھا تو کیا بنتا، اُلٹی اس کی چونچ زخمی ہو گئی۔

استاد کا نوٹ

الف) ہُدہُد کا طریقہ یاد رکھیے: وہ اپنی لمبی نوک دار چونچ سے درخت کا تنا کھود کر 'کھوہ' بناتا ہے اور اسی میں رہتا ہے۔
ب) 'کھٹ۔ کھٹ۔ کھٹ' آواز کو ظاہر کرنے والا لفظ ہے؛ ایسے لفظوں سے کہانی میں جان پڑتی ہے۔
ج) 'کھوہ' یعنی کھوکھلی جگہ، 'برادہ' یعنی لکڑی کا چورا، اور 'حرج' یعنی نقصان۔