NCERT Class 1 Urdu Shahnai Chapter 08 Sardi Ki Do Pahar PDF Download

سبق 8 - سردی کی دوپہر

"امّی بھوک لگی ہے، جلدی کھانا دیجیے۔" اسکول کی چھٹی کے بعد گھر پہنچتے ہی آمنہ نے کہا۔ "آ گئی میری شہزادی"۔ امّی نے پھول سی آمنہ کو پیار کیا۔

"بس ابھی لاتی ہوں۔ تمھارا بھائی جاوید کہاں ہے؟" امّی نے پوچھا۔

"وہ آتے ہی چھت پر چلے گئے" آمنہ نے کہا۔

امّی بولیں، "تم بھی چھت پر چلی جاؤ۔ آج ٹھنڈ بہت ہے۔ دھوپ لگا لو، تمھارے دادا جی بھی وہیں ہیں۔" "اچھّا" کہہ کر آمنہ سیڑھیاں چڑھتے ہوئے اوپر گئی۔

"ایک... دو... تین... چار... پانچ... چھے... سات... آٹھ... نو" آمنہ ہر سیڑھی پر قدم رکھتی اور گنتی جاتی۔

[تصویر: چھت پر اخبار پڑھتے دادا جی، جھولا جھولتا جاوید اور آمنہ، درسی کتاب میں دیکھیں]

چھت پر دادا جی اخبار پڑھ رہے تھے۔ ان کے سامنے تھال میں پھل رکھے تھے۔ جاوید جھُولا جھول رہا تھا۔

آمنہ دادا جی کو سلام کر کے بھاگتی ہوئی جھُولے کی طرف گئی۔

دادا جی نے پاس رکھی بوتل کا ڈھکن کھول کر پانی پی کر کہا، "آ گئی میری بچّی۔"

اتنے میں امّی چھت پر ہی کھانا لے کر آ گئیں۔ جاوید بولا، "بڑی اچھی خوش بو آ رہی ہے۔" امّاں بولیں، "آج آلو گوبھی کی سبزی بنائی ہے۔"

اتنے میں سڑک سے کوئی ڈھول بجاتا ہوا گزرا۔ ڈھم ڈھم ڈھم ڈھم...

آمنہ دوڑی ہوئی ڈھول بجانے والے کو دیکھنے گئی۔ خود بھی ڈھول کی تھاپ پر جھوم اٹھی۔ پھر سب نے مل کر کھانا کھایا اور ٹھنڈ میں دھوپ کے مزے لیے۔

[تصویر: چھت سے سڑک پر ڈھول بجانے والے کو دیکھتی آمنہ، درسی کتاب میں دیکھیں]

استاد کا نوٹ

الف) کہانی کے کردار: آمنہ، اس کا بھائی جاوید، امّی اور دادا جی؛ سب سردی کی دوپہر چھت پر دھوپ لیتے ہیں۔
ب) آمنہ سیڑھیاں چڑھتے ہوئے ایک سے نو تک گنتی گنتی ہے۔
ج) امّی نے آلو گوبھی کی سبزی بنائی تھی، اور آمنہ ڈھول کی تھاپ پر جھوم اٹھی۔

اساتذہ کے لیے ہدایات

اس سبق کی مدد سے بچّوں کو ہکاری آوازیں سکھائی جائیں۔

بچّوں سے معلوم کیجیے کہ اس سبق میں ایسے کون سے الفاظ ہیں جن میں 'بھ' کی آواز پائی جاتی ہے۔ بچّے کہیں گے۔ بھوک، بھائی، ابھی، بھاگتی اور گوبھی۔

یہ الفاظ تختۂ سیاہ پر لکھ کر بچّوں کو بتائیں کہ ان میں آنے والا حرف 'بھ' دو حروف 'ب' اور 'ھ' سے مل کر بنا ہے۔ تختۂ سیاہ پر اسے لکھ کر دکھائیں۔
ب + ھ = بھ

اسی طرح پھ، تھ، ٹھ، جھ، چھ، دھ، ڈھ، رھ، ڑھ، کھ اور گھ کے لیے بھی اوپر دیے ہوئے طریقے کو دوہرایئے۔ بچّوں کو بتایئے کہ یہ حروف ہکاری حروف کہلاتے ہیں۔ یہ تمام حرف دو حروف سے مل کر بنے ضرور ہیں لیکن ان کی آواز ایک ہی ہے اور ملنے کے بعد اب یہ دو نہیں ایک ہی حرف ہے۔

استاد کا نوٹ

الف) ہکاری حرف کسی حرف کے ساتھ دو چشمی 'ھ' ملا کر بنتا ہے، جیسے ب + ھ = بھ۔
ب) کہانی سے ہکاری آوازوں والے لفظ: بھوک، چھٹی، چھت، دھوپ، ٹھنڈ، ڈھول اور جھولا۔
ج) ہکاری حرف لکھنے میں دو حروف سے بنتا ہے، لیکن اس کی آواز ایک ہی ہوتی ہے۔