NCERT Class 8 Urdu Khayaal Chapter 18 Masnoi Zehanat PDF Download

سبق 15: مصنوعی ذہانت

ہر جاندار ایک چھوٹا یا بڑا دماغ رکھتا ہے۔ اُس کا بہتر اور مناسب استعمال 'ذہانت' کہلاتا ہے۔ انسانوں میں یہ دماغ اور اس کی کارکردگی اعلیٰ ترین سطح پر نظر آتی ہے۔ اِسی ذہانت کی مدد سے انسان صدیوں سے نت نئی ایجادات کر رہا ہے، نئی نئی مشینیں بنا رہا ہے۔ شروع میں یہ مشینیں ہاتھ سے چلتی تھیں پھر بھاپ کی طاقت سے چلیں اور اب بجلی یا سورج کی توانائی سے چلنے لگی ہیں۔ ان کو خاص وقت پر اپنے آپ چلانے کے طریقے کو ہم 'خود کاری' اور ایسی مشین کو خود کار یعنی آٹومیٹک کہتے ہیں۔ حیدر آباد دکن کے مشہور سالارِ جنگ میوزیم میں ایسی ہی ایک خود کار میوزیکل گھڑی لگی ہوئی ہے جس میں ہر گھنٹے پر ایک دروازہ کھلتا ہے اور ایک درباری دونوں ہاتھوں میں گھنٹہ بجانے کے گُرز لے کر باہر نکلتا ہے اور ٹھیک وقت پر وہ اس سے گھنٹہ بجا دیتا ہے۔ چار بجے چار گھنٹے اور بارہ بجے بارہ گھنٹے۔ یہ خود کار کردگی مشین میں میکانیکل یعنی مشینی پرزوں کی مدد سے سیٹ کی گئی تھی۔

[تصویر: سالارِ جنگ میوزیم کی میوزیکل گھڑی، اپنی درسی کتاب میں دیکھیں]

کمپیوٹر کی ایجاد نے مشینوں کی خود کاری (آٹومیشن) کو بہت بہتر اور تیز کر دیا۔ ہماری کپڑے دھونے کی مشین اب اپنے آپ کام مکمل ہونے پر رُک جاتی ہے، کھانا گرم کرنے والے مائیکرو ویو اَوَن ہمارے حکم (کمانڈ) کے مطابق 5 یا 10 منٹ کھانا گرم کر کے خود رُک جاتے ہیں۔ لیکن یہ خود کاری کی وہ قسم تھی جس کو ہم سیٹ کرتے ہیں۔ آپ سوچیں کہ اگر کوئی مائیکرو ویو کھانے کو دیکھ کر خود فیصلہ کرے کہ اِس کو کس طرح اور کتنی دیر گرم کرے تو یہ کتنا اچھا ہو گا۔ یعنی ہم خود مشین کے اندر ذہانت پیدا کر دیں کہ وہ سوچ سکے، کام کو سمجھے اور ضرورت کے مطابق ایک فیصلہ لے کر اُس پر عمل کرنے لگے۔ اِسی کو ہم 'مصنوعی ذہانت' کہتے ہیں یعنی انسان کے ذریعے بنائی گئی ذہانت جو مشینوں کو خود سوچنے، سمجھنے، دیکھنے، سننے اور کام کرنے کی صلاحیت دیتی ہے۔ ہمارے روبوٹ اس کا نمونہ ہیں۔

[تصویر: مائیکرو ویو میں کھانا رکھتا بچہ اور 'الیکسا' سے بات کرتی لڑکی، اپنی درسی کتاب میں دیکھیں]

استاد کا نوٹ

الف) دو اصطلاحوں کا فرق سمجھیے: 'خود کاری' (آٹومیشن) میں مشین وہی کرتی ہے جو ہم سیٹ کریں، جب کہ 'مصنوعی ذہانت' میں مشین خود سوچ کر فیصلہ کرتی ہے۔
ب) مشینوں کو چلانے کی طاقت کی ترتیب: پہلے ہاتھ، پھر بھاپ، اور اب بجلی یا سورج کی توانائی۔
ج) سالارِ جنگ میوزیم حیدر آباد دکن میں ہے؛ اس کی گھڑی مشینی پرزوں (میکانیکل) سے خود کار بنائی گئی تھی۔

آپ گھر میں سیری، الیکسا یا گوگل اسسٹنٹ کو کچھ کرنے کو کہتے ہیں یا کچھ پوچھتے ہیں تو وہ جواب دیتا ہے۔ گوگل پر جب آپ کوئی سوال ٹائپ کرتے اور جواب پاتے ہیں، یا آپ کے گھر میں ایسا موبائل فون ہے جو استعمال کرنے والے کا چہرہ پہچان کر کھلتا ہے۔ یہ سب مصنوعی ذہانت کے کرشمے ہیں۔

مصنوعی ذہانت کمپیوٹر سائنس کا ہی ایک نیا شعبہ ہے۔ اِس میں اِسی طرح کے 'سوفٹ ویئر' یعنی کمپیوٹر پروگرام بنائے جاتے ہیں جو مشینوں کو اپنے ماحول کو سمجھنے، اطراف کی ہر چیز کو سیکھنے پہچاننے اور ان کے بارے میں 'اپنی سمجھ' سے فیصلہ کرنا سکھاتے ہیں تا کہ وہ مطلوبہ کام کر سکیں۔ اس کی شروعات اگرچہ 1956 میں ہوئی تھی لیکن کمپیوٹر سائنس میں ہونے والی پیش رفت اور تیز رفتار ترقی کے بعد 2000 سے مصنوعی ذہانت کے میدان کو بھی وسعت ملنے لگی اور پھر 2020 کے دہے سے 'ذہین' مشینیں، کمپیوٹر، آلات اور موبائل تیزی سے بننے اور پھیلنے لگے۔

[تصویر 1: نیوران - ڈینڈرائٹ (شاخ جیسا)، سیل باڈی، ایکسون اور مائیلن شیٹ، اپنی درسی کتاب میں دیکھیں]

استاد کا نوٹ

الف) مصنوعی ذہانت کی تاریخیں یاد رکھیے: شروعات 1956 میں، 2000 سے اس میدان کو وسعت ملی، اور 2020 کے دہے سے ذہین مشینیں تیزی سے پھیلیں۔
ب) 'سوفٹ ویئر' کا مطلب ہے کمپیوٹر پروگرام؛ مصنوعی ذہانت کمپیوٹر سائنس کا ایک نیا شعبہ ہے۔
ج) روزمرہ کی مثالیں جو سبق میں آئی ہیں: سیری، الیکسا، گوگل اسسٹنٹ، اور چہرہ پہچان کر کھلنے والا موبائل فون۔