NCERT Class 8 Urdu Khayaal Chapter 04 Ashfaqullah Khan PDF Download

سبق 4: اشفاق اللہ خاں

ہندوستان کی تحریکِ آزادی میں ایسے بے شمار نام شامل ہیں جنھوں نے وطنِ عزیز کے لیے اپنی جانیں تک قربان کر دی ہیں۔ قربانی دینے والے انھیں سپوتوں میں ایک نام کاکوری کیس میں شامل مجاہدِ آزادی اشفاق اللہ خاں کا بھی ہے۔ وہ نہ صرف ایک عظیم محبِّ وطن بلکہ قومی اتحاد کے بھی علم بردار تھے۔

اشفاق اللہ خاں 22/اکتوبر 1900 کو اتر پردیش کے شہر شاہ جہاں پور میں پیدا ہوئے۔ ان کے والد شفیق اللہ خاں محکمۂ پولیس سے بہ حیثیت انسپکٹر ریٹائرڈ تھے۔ اور والدہ مظہر النسا ایک نیک سیرت خاتون تھیں۔ اشفاق اللہ خاں اپنے بہن بھائیوں میں سب سے چھوٹے تھے۔

[تصویر: اشفاق اللہ خاں، اپنی درسی کتاب میں دیکھیں]

وہ نہایت ذہین، خوش مزاج، جوشیلے اور بہادر تھے۔ ان کی والدہ اکثر انھیں بہادری اور وطن دوستی کے قصّے سناتی تھیں۔ ان قصوں نے انھیں حد درجہ متاثر کیا۔ وہ وطن پر انگریزوں کے ظلم و ستم کے واقعات سن کر تڑپ اٹھتے تھے۔ زیادتیوں کے واقعات سن سن کر ان کے ذہن میں انگریزی حکومت کے خلاف بغاوت کا جذبہ شدید ہوتا گیا۔ بڑھتی عمر کے ساتھ اشفاق اللہ خاں کے دل میں ہندوستان کو انگریزوں کے قبضے سے آزاد کرانے کی خواہش زور پکڑتی گئی۔ یہی خواہش انھیں انقلابی تحریک کی طرف لے گئی۔

استاد کا نوٹ

الف) اشفاق اللہ خاں کی پیدائش: 22/اکتوبر 1900، شاہ جہاں پور (اتر پردیش)۔
ب) والدین کے نام یاد رکھیے: والد شفیق اللہ خاں اور والدہ مظہر النسا۔
ج) 'علم بردار' کا مطلب ہے جھنڈا اٹھانے والا، یعنی کسی مقصد کا رہنما۔

اس تحریک کے روحِ رواں اُس وقت رام پرساد بسملؔ تھے۔ اشفاق اللہ خاں کے بڑے بھائی ریاست اللہ خاں انھیں اکثر رام پرساد بسملؔ کے انقلابی کارناموں کے قصے سنایا کرتے تھے جس سے اُن کے دل میں بسملؔ سے ملنے کی خواہش پنپنے لگی۔ جب وہ اُن سے ملے تو ان کے انقلابی خیالات سے بہت متاثر ہوئے اور ان کے ساتھ مل کر ایک انقلابی تنظیم 'ہندوستان ری پبلیکن ایسوسی ایشن' کی بنیاد ڈالی۔

رام پرساد بسملؔ کو اشفاق اللہ خاں پر اتنا بھروسہ ہو گیا کہ انھوں نے انھیں اپنا رازدار بنا لیا۔ دونوں کے آپسی مراسم بہت گہرے ہوتے گئے۔ دونوں قومی اتحاد اور معاشرتی و مذہبی اصلاحات کے بڑے حامی تھے۔ دونوں کو سیاست اور شاعری سے شغف تھا۔ ان کی انقلابی نظموں اور تقریروں کو بڑے شوق سے سنا جاتا تھا۔ شاعری میں اشفاق اللہ خاں کا تخلص حسرتؔ تھا۔

[تصویر: بچے کو قصہ سناتی ہوئی ماں، اپنی درسی کتاب میں دیکھیں]

انگریزی حکومت کے خلاف انقلابی سرگرمیوں کو تیز کرنے کے لیے سرمایہ کی ضرورت تھی چنانچہ انقلابیوں نے سرمایے کی فراہمی کے لیے سرکاری خزانے پر قبضہ کرنے کا منصوبہ بنایا۔ اس کام کے لیے دس افراد کی جماعت بنائی گئی۔ جس میں اشفاق اللہ خاں خود شامل تھے۔ رام پرساد بسملؔ نے اپنے انقلابی ساتھیوں کے سامنے ٹرین سے لے جائے جا رہے سرکاری خزانے پر قبضہ کرنے کی تجویز پیش کی۔ اس تجویز کو تمام ساتھی خاموشی سے سُن رہے تھے۔ اشفاق اللہ نے خاموشی توڑی اور پچھلے معاملات میں اپنائے گئے طریقوں کی کمزوریوں کا ذکر کیا اور اس منصوبے کو ان کمزوریوں سے بچانے کا مشورہ دیا۔ ان کے مشوروں کو انقلابی جماعت کے لوگ ہمیشہ قدر کی نگاہ سے دیکھتے تھے۔ تجویز اتفاقِ رائے سے منظور ہو گئی۔ پھر اشفاق اللہ خاں نے کہا، "کہنا میرا کام تھا کہہ دیا۔ کام ہم سب مل کر کریں گے۔ ضرورت پڑی تو میں جان بھی دے دوں گا لیکن منصوبے کو ناکام نہیں ہونے دوں گا۔"

[تصویر: ترنگا لہراتا ہوا مجاہدِ آزادی، اپنی درسی کتاب میں دیکھیں]

استاد کا نوٹ

الف) شاعری میں اشفاق اللہ خاں کا تخلص حسرتؔ تھا اور ان کے ساتھی رام پرساد کا تخلص بسملؔ۔
ب) انقلابی تنظیم کا نام یاد رکھیے: 'ہندوستان ری پبلیکن ایسوسی ایشن'۔
ج) 'روحِ رواں' کا مطلب ہے کسی تحریک کو چلانے والی اصل شخصیت؛ 'شغف' یعنی گہرا شوق۔