NCERT Class 8 Urdu Khayaal Chapter 05 Mitti PDF Download

مِٹّی

(پڑھنے کے لیے)

مٹّی کے سب رنگ انوکھے، سب دیوانے مٹّی کے
مٹّی کے سب کھیل کھلاڑی، نئے پرانے مٹّی کے
مٹّی کی یہ سُندر کایا، مٹّی کی ہی ساری مایا
کنکر پتّھر، سونا چاندی، سولہ آنے مٹّی کے

مٹّی کے سب کھیت ہمارے، مٹّی کی پگ ڈنڈی بھی
مٹّی کے ہریالے پودے، دانے دانے مٹّی کے
مٹّی کے سب محل دو محلے، مٹّی کی چھوٹی سی کٹیا
مٹّی کے سب دیے، یہ شمعیں، سب پروانے مٹّی کے

مٹّی کا بازار لگا ہے، کورے کورے سے برتن
کس کی صُراحی، کس کا پیالہ، سب پیمانے مٹّی کے
مٹّی کی خوش بوٗ میں بسا ہے، مٹّی کا یہ ذرّہ ذرّہ
مٹّی کو مٹّی ہی پکارے، حیلے بہانے مٹّی کے

- خلیل الرحمن اعظمی

[تصویر: چاک پر برتن بناتی عورت اور مٹی کے کھلونوں سے کھیلتے بچے، اپنی درسی کتاب میں دیکھیں]

استاد کا نوٹ

الف) یہ نظم 'پڑھنے کے لیے' دی گئی ہے اور خلیل الرحمن اعظمی کی لکھی ہوئی ہے۔
ب) تقریباً ہر دوسرا مصرع 'مٹّی کے' پر ختم ہوتا ہے: دیوانے، پرانے، آنے، دانے، پروانے، پیمانے اور بہانے اس کے قافیے ہیں۔
ج) 'سولہ آنے' محاورہ ہے، یعنی پورے کا پورا؛ 'کایا' کا مطلب ہے جسم اور 'کٹیا' یعنی چھوٹی سی جھونپڑی۔