NCERT Class 7 Urdu Khayaal Chapter 11 Do Bailon Ki Kahani PDF Download

سبق 11: دو بیلوں کی کہانی

جھوری کاچھی کے پاس دو بیل تھے۔ ایک کا نام تھا ہیرا اور دوسرے کا موتی۔ دونوں دیکھنے میں خوب صورت، کام میں چوکس، ڈیل ڈول میں اونچے۔ بہت دنوں سے ایک ساتھ رہتے تھے۔ دونوں میں محبت ہو گئی تھی۔ جس وقت یہ دونوں بیل ہل یا بیل گاڑی میں جوتے جاتے اور گردنیں ہلا ہلا کر چلتے تو ہر ایک کی یہی کوشش ہوتی کہ زیادہ بوجھ میری ہی گردن پر رہے۔ ایک ساتھ ناند میں منہ ڈالتے۔ ایک ساتھ ہی بیٹھتے۔ ایک منہ ہٹا لیتا تو دوسرا بھی ہٹا لیتا۔

اتفاق کی بات، جھوری نے ایک بار دونوں بیل چند دنوں کے لیے اپنی سسرال بھیج دیے۔ بیلوں کو کیا معلوم وہ کیوں بھیجے جا رہے ہیں۔ سمجھے مالک نے ہمیں بیچ دیا۔ اگر ان بے زبانوں کی زبان ہوتی تو جھوری سے پوچھتے، "تم نے ہم غریبوں کو کیوں نکال دیا؟ ہم نے کبھی دانے چارے کی شکایت نہیں کی۔ تم نے جو کچھ کھلایا، سر جھکا کر کھا لیا، پھر تم نے ہمیں کیوں بیچ دیا۔"

[تصویر: ناند سے چارا کھاتے دو بیل، اپنی درسی کتاب میں دیکھیں]

استاد کا نوٹ

الف) کہانی کے کردار یاد رکھیے: کسان جھوری کاچھی اور اس کے دو بیل ہیرا اور موتی۔
ب) بیلوں کی محبت کی نشانیاں: زیادہ بوجھ اپنی ہی گردن پر لینے کی کوشش، ایک ساتھ ناند میں منہ ڈالنا اور ایک ساتھ بیٹھنا۔
ج) 'چوکس' یعنی ہوشیار، 'ڈیل ڈول' یعنی جسم کی بناوٹ، اور 'ناند' وہ بڑا برتن جس میں جانوروں کو چارا دیا جاتا ہے۔

شام کے وقت دونوں بیل گیا کے گاؤں جا پہنچے۔ دن بھر کے بھوکے تھے، دونوں کا دل بھاری ہو رہا تھا جسے انھوں نے اپنا گھر سمجھا تھا، وہ اُن سے چھوٹ گیا تھا۔ جب گاؤں میں سوتا پڑ گیا، تو دونوں نے زور مار کر پگھے تڑا لیے اور گھر کی طرف چلے۔ جھوری نے صبح اٹھ کر دیکھا تو دونوں بیل چرنی میں کھڑے تھے۔ گھٹنوں تک پاؤں کیچڑ میں بھرے ہوئے تھے اور دونوں کی آنکھوں میں محبت کی ناراضگی جھلک رہی تھی۔ جھوری اُن کو دیکھ کر محبت سے باؤلا ہو گیا اور دوڑ کر اُن کے گلے سے لپٹ گیا۔ گھر اور گاؤں کے لڑکے جمع ہو گئے اور تالیاں بجا بجا کر اُن کا خیر مقدم کرنے لگے۔ کوئی اپنے گھر سے روٹیاں لایا، کوئی گُڑ اور کوئی بھوسی۔

[تصویر: بیلوں کے گلے لگتا جھوری اور خوشی سے تالیاں بجاتے بچے، اپنی درسی کتاب میں دیکھیں]

جھوری کی بیوی نے بیلوں کو دروازے پر دیکھا تو جل اُٹھی، بولی، "کیسے نمک حرام بیل ہیں۔ ایک دن بھی وہاں کام نہ کیا، بھاگ کھڑے ہوئے۔"

جھوری اپنے بیلوں پر یہ الزام برداشت نہ کر سکا، بولا، "نمک حرام کیوں ہیں؟ چارہ نہ دیا ہو گا، تو کیا کرتے۔"

عورت نے تنک کر کہا، "بس تمھیں بیلوں کو کھلانا جانتے ہو، اور تو سبھی پانی پلا پلا کر رکھتے ہیں۔"

دوسرے دن جھوری کا سالا جس کا نام 'گیا' تھا، جھوری کے گھر آیا اور بیلوں کو دوبارہ لے گیا۔ اب کے اس نے گاڑی میں جوتا۔ شام کو گھر پہنچ کر گیا نے دونوں کو موٹی رسیوں سے باندھا اور پھر وہی خشک بھوسا ڈال دیا۔

ہیرا اور موتی اس برتاؤ کے عادی نہ تھے۔ جھوری اُنھیں پھول کی چھڑی سے بھی نہ مارتا تھا۔ یہاں مار پڑی، اس پر خشک بھوسا، ناند کی طرف آنکھ بھی نہ اُٹھائی۔

[تصویر: بیل گاڑی میں جُتے ہیرا اور موتی کو چھڑی سے ہانکتا گیا، اپنی درسی کتاب میں دیکھیں]

استاد کا نوٹ

الف) جھوری کے سالے کا نام 'گیا' ہے؛ بیل دو بار اس کے گاؤں لے جائے گئے۔
ب) 'نمک حرام' یعنی احسان نہ ماننے والا؛ جھوری کی بیوی بیلوں کو یہ کہتی ہے مگر جھوری یہ الزام نہیں مانتا۔
ج) 'پگہا' جانور باندھنے کی رسی ہے، 'چرنی' وہ جگہ جہاں جانور چارا کھاتے ہیں، اور 'خیر مقدم' یعنی استقبال۔