NCERT Class 7 Urdu Khayaal Chapter 10 Cheontiyon Ki Qataar PDF Download

سبق 10: چیونٹیوں کی قطار

کتنی دل کش ہے چیونٹیوں کی قطار
ہیں یہ اتنی، نہیں ہے جن کا شمار

چال میں نظم و ضبط ہے کتنا
ان میں آپس میں ربط ہے کتنا

لشکرِ بے نظیر کی صورت
ایک کالی لکیر کی صورت

عزم و ہمت سے ہیں سبھی لبریز
اپنے کاموں میں ہیں یہ کتنی تیز

یہ نہایت ذہین لگتی ہیں
ننھّی منّی مشین لگتی ہیں

اپنی منزل کی سَمت سب ہیں رواں
حوصلے ان کے لگ رہے ہیں جواں

جانتی ہی نہیں تھکاوٹ کو
مانتی ہی نہیں رکاوٹ کو

ٹوک سکتا نہیں انھیں کوئی
روک سکتا نہیں انھیں کوئی

عزم کی یہ چٹان ہوتی ہیں
اس لیے کامران ہوتی ہیں

سخت راہوں سے بھی گزر جائیں
مشکلوں سے کبھی نہ گھبرائیں

ہم کو غفلت سے یہ جگاتی ہیں
کام کرنے کے گُر سکھاتی ہیں

ہمتوں کا نشان ان کی قطار
عظمتوں کا جہان ان کی قطار

جان ننھی سی کام ان کا بڑا
پھر نہ کیسے ہو نام ان کا بڑا

دے رہی ہیں یہ محنتوں کا پیام
ہم کریں ان کے حوصلوں کو سلام

- ظفر کمالی

[تصویر: قطار میں چلتی چیونٹیاں اور مل کر بسکٹ کا ٹکڑا اٹھاتی چیونٹیاں، اپنی درسی کتاب میں دیکھیں]

استاد کا نوٹ

الف) اس نظم کا ہر شعر اپنا الگ قافیہ رکھتا ہے اور دونوں مصرعے ہم قافیہ ہیں، جیسے قطار/شمار، تھکاوٹ/رکاوٹ، چٹان/کامران۔
ب) شاعر نے چیونٹیوں کی قطار کو 'لشکرِ بے نظیر' اور 'ایک کالی لکیر' سے تشبیہ دی ہے، اور چیونٹیوں کو 'ننھّی منّی مشین' کہا ہے۔
ج) 'لبریز' یعنی پوری طرح بھرا ہوا، 'کامران' یعنی کامیاب، اور 'گُر' یعنی طریقہ یا ہنر؛ یہ نظم ظفر کمالی کی ہے۔