NCERT Class 7 Urdu Khayaal Chapter 09 Dr Sarvepalli Radhakrishnan PDF Download

سبق 9: ڈاکٹر سروپلی رادھا کرشنن

ہمارے ملک میں اساتذہ کی حیثیت ایک نعمت کی رہی ہے جن سے استفادہ کا سلسلہ صدیوں سے آج تک جاری ہے۔ ان کے دیے ہوئے سبق کی روشنی صرف کلاس کے کمروں تک ہی محدود نہیں بلکہ ساری دنیا میں پھیلتی رہی ہے۔ اسی سلسلے کی ایک کڑی ڈاکٹر سروپلّی رادھا کرشنن ہیں جو فلسفے میں غیر معمولی حیثیت رکھنے والے استاد تھے۔ وہ پہلے ہندوستانی ہیں جنھوں نے دماغوں کو روشن کرنے والے اپنے لیکچر اور علمی کتابوں کے ذریعے ہندوستانی فلسفے کو مغربی ملکوں کے سامنے پیش کیا تھا۔

رادھا کرشنن 5/ستمبر 1888 کو تیروتانی کے مقام پر پیدا ہوئے۔ ان کے والد کا نام سروپلی ویرسومیّا اور ماں کا نام سیتامّا تھا۔ سروپلی آندھرا پردیش کا ایک گاؤں ہے جہاں سے رادھا کرشنن کے بزرگ ہجرت کر کے تامل ناڈو میں آباد ہو گئے تھے۔ ویرسومیّا ایک زمینداری میں بہت معمولی ملازم تھے۔

رادھا کرشنن کی اسکولی تعلیم پہلے تیروتانی اور بعد میں تروپتی کے لوتھیرن مشن اسکول میں ہوئی۔ اس کے بعد انھوں نے ویلّور کے وورہیس (Voorhees) کالج میں تعلیم حاصل کی۔

ڈاکٹر سروپلّی رادھا کرشنن کا شمار ان شخصیات میں ہوتا ہے جنھوں نے بچپن میں نامساعد حالات، مالی مشکلات اور دوسرے خانگی مسائل کے باوجود اپنی ہمت اور حوصلے سے بلند ترین مقامات حاصل کیے۔ وظیفوں کی مدد سے انھوں نے اپنی ابتدائی اور ثانوی تعلیم مکمل کی۔ ان کی صلاحیت اور قابلیت کو دیکھتے ہوئے ان کے اساتذہ کا مشورہ تھا کہ انھیں اعلیٰ تعلیم کے لیے آکسفورڈ یونیورسٹی جا کر تعلیم حاصل کرنا چاہیے۔ خود ان کی بھی خواہش تھی لیکن یہ ممکن نہ ہو سکا۔ اپنے خاندان کی قلیل آمدنی میں اضافہ کرنے کے لیے انھیں دورانِ طالب علمی میں ہی کام کرنا پڑا۔ اُنھیں اپنے وہ سونے کے تمغے بھی فروخت کرنے پڑے جو انھیں کئی امتحانوں میں امتیازی پوزیشن حاصل کرنے پر ملے تھے۔ اپنے ملک میں رہ کر ہی انھوں نے اپنی ذہانت، محنت اور لگن سے اعلیٰ ترین تعلیمی سفر، شاندار کامیابی کے ساتھ طے کیا اور ایک منفرد مقام حاصل کیا۔

[تصویر: ڈاکٹر سروپلی رادھا کرشنن، اپنی درسی کتاب میں دیکھیں]

استاد کا نوٹ

الف) رادھا کرشنن کی پیدائش: 5/ستمبر 1888، تیروتانی؛ والد سروپلی ویرسومیّا اور والدہ سیتامّا۔
ب) تعلیمی سفر کی ترتیب یاد رکھیے: تیروتانی، پھر تروپتی کا لوتھیرن مشن اسکول، اور پھر ویلّور کا وورہیس (Voorhees) کالج۔
ج) 'نامساعد حالات' یعنی مشکل حالات، 'خانگی' یعنی گھریلو، اور 'قلیل' یعنی تھوڑی۔

ایم۔اے کے بعد رادھا کرشنن 1909 میں مدراس پریسیڈنسی کالج میں اسسٹنٹ لیکچرر ہو گئے۔ یہ ان کی تدریسی زندگی کا آغاز تھا۔

انھوں نے ہندوستانی کلاسیکی فلسفے کو سمجھنے کے لیے بہت سی کتابوں کا مطالعہ کیا جن میں اُپ نِشد، بھگوت گیتا اور بدھ مت کی بنیادی تحریریں خاص ہیں۔ انھوں نے چینی اور مغربی ملکوں کے فلسفے کا بھی مطالعہ کیا۔ مغربی فلسفے نے ڈاکٹر رادھا کرشنن کے ذہن پر گہرا اثر ڈالا۔ رفتہ رفتہ پتلا دبلا سا جسم، بڑا سا سر، چشمہ لگائے، کھلی روشن پیشانی، پتلی عقابی ناک، ایک لمبا پیلا سا کوٹ، سفید پگڑی اور بے داغ سفید دھوتی میں ملبوس یہ شخص علمی دنیا کے لیے ایک جانی پہچانی شخصیت بنتا چلا گیا۔

مدراس کے پریسیڈنسی کالج کے طالب علموں کا کہنا ہے کہ ان کا لیکچر موضوع کی وضاحت اور صفائی میں بے مثال ہوتا تھا۔ اس نوجوان استاد کا ان کے طالب علم دل سے احترام کرتے تھے۔ انھوں نے کبھی کلاس میں ایک لفظ سخت نہیں کہا مگر ان کی کلاس کا نظم و ضبط سب سے بہتر تھا۔

ایک مثالی اور ممتاز استاد کی حیثیت حاصل کرنے کے ساتھ ساتھ رادھا کرشنن نے کئی علمی مضامین لکھے جو دنیا کے اہم جریدوں میں شائع ہوئے، جن سے لوگ بے حد متاثر ہوئے۔ ان کی علمیت، قابلیت اور مقبولیت کو دیکھتے ہوئے 1918 میں رادھا کرشنن کو میسور یونیورسٹی میں فلسفے کا پروفیسر مقرر کیا گیا۔

ڈاکٹر رادھا کرشنن کی پہلی کتاب 'دی فلاسفی آف رابندر ناتھ ٹیگور' (The Philosophy of Rabindranath Tagore) کے عنوان سے شائع ہوئی۔ دو سال بعد 1920 میں اُن کی دوسری کتاب، 'دی رین آف ریلیجن اِن کانٹمپریری فلاسفی' (The Reign of Religion in Contemporary Philosophy) منظرِ عام پر آئی۔

[تصویر: کتابوں کے سامنے لیکچر دیتے ڈاکٹر رادھا کرشنن، اپنی درسی کتاب میں دیکھیں]

استاد کا نوٹ

الف) تدریسی زندگی کی تاریخیں یاد رکھیے: 1909 میں مدراس پریسیڈنسی کالج میں اسسٹنٹ لیکچرر، 1918 میں میسور یونیورسٹی میں فلسفے کے پروفیسر۔
ب) ان کی پہلی کتاب 'دی فلاسفی آف رابندر ناتھ ٹیگور' تھی اور دوسری کتاب 1920 میں آئی۔
ج) 'جریدہ' یعنی رسالہ یا جرنل؛ 'عقابی ناک' یعنی عقاب کی چونچ جیسی خم دار ناک۔