NCERT Class 7 Urdu Khayaal Chapter 03 Pehli Udaan PDF Download

سبق 3: پہلی اُڑان

[تصویر: دیوار کے پاس درخت پر گھونسلے میں بچہ اور اُڑتی ہوئی چڑیا، اپنی درسی کتاب میں دیکھیں]

چڑیا کے گھونسلے سے ایک بچے کی آواز آ رہی تھی۔ وہ جب دانوں پر چونچ مارتی، تو ایک دو دانوں سے زیادہ نہ لیتی اور فوراً گھونسلے کا رُخ کرتی۔ وہاں اس کے پہنچتے ہی بچے کا شور شروع ہو جاتا۔ ایک دو سیکنڈ کے بعد چڑیا پِھر آتی اور دانہ لے کر اُڑ جاتی۔ ایک مرتبہ میں نے گِنا تو ایک منٹ کے اندر سات مرتبہ آئی گئی۔

جن علمائے عِلمُ الحیوان نے اس جنس کے پرندوں کے خصائص کا مطالعہ کیا ہے اُن کا بیان ہے کہ ایک چڑیا دن بھر میں ڈھائی سو سے تین سو مرتبہ تک بچے کو غذا دیتی ہے اور اگر دن بھر کی مجموعی مقدارِ غذا بچے کے جسم کے مقابلہ میں رکھی جائے تو اس کا حجم (Mass) کسی طرح بھی بچے کے جسمانی حجم سے کم نہ ہو گا۔ مگر بچوں کی قوتِ ہاضمہ اِس تیزی سے کام کرتی رہتی ہے کہ اِدھر دانہ ان کے اندر گیا، اُدھر تحلیل ہونا شروع ہو گیا۔ یہی وجہ ہے کہ پرندوں کے بچوں کی نشو و نما کا اوسط چوپایوں کے بچوں کی اوسط سے زیادہ ہوتا ہے اور بہت تھوڑی مدت کے اندر وہ بُلوغ تک پہنچ جاتے ہیں۔ چڑیا کی رفتارِ عمل سے مجھے اس بیان کی پوری تصدیق مل گئی۔ پھر جوں جوں بچوں کے پَر بڑھنے لگتے ہیں، وِجدان کا فرشتہ آتا ہے اور ماں کے کان میں سرگوشیاں شروع کر دیتا ہے کہ اب اِنھیں اُڑنے کا سبق سکھانا چاہیے۔ معلوم ہوتا ہے، چڑیا کے کانوں میں یہ سرگوشی شروع ہو گئی تھی۔

[تصویر: زمین پر گرے بچے کے پاس اُترتی چڑیا، اپنی درسی کتاب میں دیکھیں]

استاد کا نوٹ

الف) سبق کے مطابق ایک چڑیا دن بھر میں ڈھائی سو سے تین سو مرتبہ تک بچے کو غذا دیتی ہے۔
ب) 'عِلمُ الحیوان' جانوروں کا علم ہے، یعنی Zoology؛ 'خصائص' لفظ 'خاصیت' کی جمع ہے۔
ج) 'تحلیل ہونا' یعنی گھل کر ہضم ہو جانا، 'نشو و نما' یعنی بڑھنا اور پھلنا پھولنا، اور 'بُلوغ' یعنی جوانی کی عمر۔

ایک دن صبح کیا دیکھتا ہوں۔ چڑیا گھونسلے سے اڑتی ہوئی اُتری، تو اس کے ساتھ ایک چھوٹا سا بچہ بھی ادھوری پرواز کے پر و بال کے ساتھ نیچے گر گیا۔ چڑیا بار بار اس کے پاس جاتی اور اُڑنے کا اشارہ کر کے اوپر کی طرف اُڑنے لگتی لیکن بچے میں اثر پذیری کی کوئی علامت دکھائی نہیں دیتی تھی، وہ پر پھیلائے، آنکھیں بند کیے بے حِس و حرکت پڑا تھا۔ میں نے اُسے اُٹھا کے دیکھا تو معلوم ہوا، ابھی پَر پوری طرح بڑھے نہیں ہیں۔ گِرنے کی چوٹ کا اثر بھی تازہ ہے اور اس نے بے حال کر دیا ہے۔ بہر حال اُسے اٹھا کے دری پر رکھ دیا۔

چڑیا چاول کے ٹکڑے چُن چُن کر منہ میں لیتی اور اُسے کھلا دیتی۔ وہ منہ کھولتے ہوئے 'چوں چوں' کی ایک مدھم اور اُکھڑی سی آواز نکال دیتا اور پھر دم بخود، آنکھیں بند کیے پڑا رہتا، پورا دن اسی حالت میں نکل گیا۔ دوسرے دن بھی اس کی حالت ویسی ہی رہی۔ ماں صبح سے لے کر شام تک برابر اُڑنے کی تلقین کرتی رہی۔ مگر اس پر کچھ ایسی مُردنی سی چھا گئی تھی کہ کوئی جواب نہیں ملتا۔ میرا خیال تھا کہ یہ اب بچے گا نہیں۔ لیکن تیسرے دن صبح کو ایک عجیب معاملہ پیش آیا۔ دھوپ کی ایک لکیر کمرے کے اندر دور تک چلی گئی تھی۔ یہ اس میں جا کر کھڑا ہو گیا تھا، پر گرے ہوئے، پاؤں مُڑے ہوئے، آنکھیں حسبِ معمول بند تھیں۔ اچانک کیا دیکھتا ہوں کہ یکا یک آنکھیں کھول کر ایک جُھرجُھری سی لے رہا ہے۔ پھر گردن آگے کر کے فَضا کی طرف دیکھنے لگا۔ پھر گرے ہوئے پروں کو سُکیڑ کر ایک دو مرتبہ کھولا، بند کیا اور پھر جو ایک مرتبہ جست لگا کر اُڑا تو بہ یک دفعہ تیر کی طرح میدان میں جا پہنچا اور پھر ہوائی کی طرح فضا میں اُڑ کر نظروں سے غائب ہو گیا۔

استاد کا نوٹ

الف) واقعات کی ترتیب یاد رکھیے: بچہ گھونسلے سے گرا، دو دن بے حس پڑا رہا، اور تیسرے دن صبح دھوپ کی لکیر میں کھڑے ہو کر اُڑ گیا۔
ب) 'بے حِس و حرکت' یعنی بغیر کسی حرکت کے، 'دم بخود' یعنی خاموش اور ساکت، اور 'تلقین' یعنی بار بار سمجھانا۔
ج) 'جست لگانا' یعنی چھلانگ لگانا؛ مصنف نے بچے کی اُڑان کو 'تیر' اور 'ہوائی' سے تشبیہ دی ہے۔