NCERT Class 7 Urdu Khayaal Chapter 02 Ek Purani Kahani PDF Download

سبق 2: ایک پرانی کہانی

[تصویر: بادلوں کے غار میں سوتا ہوا ریچھ، اپنی درسی کتاب میں دیکھیں]

لاکھوں برس گزرے۔ آسمان پر شمال کی طرف سفید بادلوں کے پہاڑ کے ایک بڑے غار میں ایک بہت بڑا ریچھ رہا کرتا تھا۔ یہ ریچھ دن بھر پڑا سوتا رہتا اور شام کے وقت اُٹھ کر ستاروں کو چھیڑتا اور ان سے شرارتیں کیا کرتا تھا۔ اس کی بدتمیزیوں اور شرارتوں سے آسمان پر بسنے والے تنگ آ گئے تھے۔

کبھی تو وہ کسی ننھے سے ستارے کو گیند کی طرح لڑھکا دیتا اور وہ ستارہ قلابازیاں کھاتا دنیا میں آ گِرتا۔ یا کبھی وہ انھیں اپنی اصلی جگہ سے ہٹا دیتا۔ اور وہ بے چارے اِدھر اُدھر بھٹکتے پھرتے۔

آخر ایک دن تنگ آ کر وہ سات ستارے، جنھیں سات بہنیں کہتے ہیں، چاند کے عقل مند بوڑھے آدمی کے پاس گئے اور ریچھ کی شرارتوں کا ذکر کر کے اس سے مدد چاہی۔

بوڑھا تھوڑی دیر تو سر کھجاتا رہا۔ پھر بولا "اچھا میں اس نامعقول کی خوب مرمّت کروں گا تم فکر نہ کرو۔" ساتوں بہنوں نے اُس کا شکریہ ادا کیا اور خوش خوش واپس چلی گئیں۔

[تصویر: ستاروں کو لڑھکاتا ہوا ریچھ، اپنی درسی کتاب میں دیکھیں]

استاد کا نوٹ

الف) کہانی کے کردار یاد رکھیے: شرارتی ریچھ، سات ستارے جنھیں 'سات بہنیں' کہتے ہیں، اور چاند کا عقل مند بوڑھا آدمی۔
ب) 'قلابازیاں کھانا' یعنی الٹ پلٹ ہوتے ہوئے گرنا؛ 'نامعقول' یعنی بے عقل یا بدتمیز۔
ج) 'مرمّت کرنا' یہاں محاورے کے طور پر آیا ہے، یعنی سزا دینا یا سبق سکھانا۔

دوسرے دن چاند کے بوڑھے نے ریچھ کو اپنے قریب بلا کر خوب ڈانٹا اور کہا "اگر تم زیادہ شرارتیں کرو گے تو تم کو آسمانی بستی سے نکال دیا جائے گا۔ کیا تمھیں معلوم نہیں کہ ان ننھے منّے ستاروں کی روشنی سے دنیا میں انسان اور جہاز اپنا اپنا راستہ دیکھتے ہیں لیکن تم انھیں روز کھیل کھیل میں ختم کر دیتے ہو۔ تمھیں یہ بھی معلوم نہیں کہ جب یہ ستارے اپنی اصلی جگہ پر نہیں رہتے تو دنیا کے مسافر اور جہاز راستہ بھول جاتے ہیں۔"

میاں ریچھ نے اِس کان سنا اور اُس کان نکال دیا اور قہقہہ مار کے بولا! "میں نے کیا دنیا کے جہازوں اور مسافروں کی روشنی کا ٹھیکہ لیا ہے جو اُن کی فکر کروں۔"

[تصویر: چاند پر بیٹھا بوڑھا، ستارے، اور بادلوں پر ریچھ اور شیر، اپنی درسی کتاب میں دیکھیں]

استاد کا نوٹ

الف) بوڑھے کے مطابق ستاروں کی اہمیت یہ ہے کہ ان کی روشنی سے دنیا میں انسان اور جہاز اپنا راستہ دیکھتے ہیں۔
ب) 'اِس کان سننا اور اُس کان نکال دینا' محاورہ ہے، یعنی بات کو سن کر بھی دھیان نہ دینا۔
ج) 'ٹھیکہ لینا' یہاں طنز کے طور پر آیا ہے، یعنی کسی کام کی ذمہ داری اپنے سر لینا۔