NCERT Class 7 Urdu Khayaal Chapter 01 Tarana-e-Wahdat PDF Download

سبق 1: ترانۂ وحدت

ہر ذرّے میں ہے ظہور تیرا
خُورشید و قمر میں نُور تیرا
افسانہ ترا جہاں جہاں ہے
چرچا ہے قریب و دُور تیرا
گاتے ہیں شجر ہَوا میں کیا کیا
دَم بھرتے ہیں سب طُیُور تیرا

تُو جلوہ فگن کہاں نہیں ہے
وہ جا نہیں، تو جہاں نہیں ہے

تاروں میں چمک دمک تری ہے
جو رَعد میں ہے کڑک، تِری ہے
ہر غُنچے میں ہے تِرا تبسُّم
ہر گُل میں بھری مہک تِری ہے
کہتی ہے کلی کلی زباں سے
میری یہ نہیں چٹک تِری ہے

بشگفتہ ہے تو چمن چمن میں
خنداں ہے گُلاب و یاسمن میں!

یہ کش مکشِ حیات کیا ہے
تیرا ہو کرم تو بات کیا ہے
اے رہبرِ کاروانِ ہستی
راہِ غم مشکلات کیا ہے
تُو جس کو دِکھا دے اک تجلّی
کیا جانے وہ غم کی رات کیا ہے

ہر ذرّے میں تیری جستجو ہے
محرُوؔم کو بھی اک آرزو ہے!

- تلوک چند محرُوؔم

[تصویر: پھولوں، پرندوں اور ندی کا منظر، اپنی درسی کتاب میں دیکھیں]

استاد کا نوٹ

الف) اس نظم کا ہر بند چھے مصرعوں اور پھر دو الگ مصرعوں پر مشتمل ہے؛ ہر بند کے آخری دو مصرعے آپس میں ہم قافیہ ہیں (کہاں/جہاں، چمن/یاسمن، جستجو/آرزو)۔
ب) آخری شعر میں شاعر کا تخلص 'محرُوؔم' آیا ہے۔
ج) 'خُورشید' یعنی سورج اور 'قمر' یعنی چاند؛ یہ دونوں لفظ پہلے ہی شعر میں ساتھ آئے ہیں۔

لفظ و معنی

غور کیجیے

• اردو کے معروف شاعر تلوک چند محرُوؔم کی یہ نظم اُن کے شعری مجموعے 'گنجِ معانی' سے منتخب کی گئی ہے۔ اس نظم میں خدا کی ذات و صفات اور قدرتی مناظر کو بڑی خوبصورتی کے ساتھ پیش کیا گیا ہے۔
• نظم کے آخری شعر میں لفظ 'محروم' استعمال ہوا ہے، اس کے معنی ہیں 'جس کو کچھ نہ ملا ہو۔' لفظ 'محروم' شاعر کے قلمی نام یا تخلص کے طور پر استعمال ہوا ہے۔ محرُوؔم کا اصل نام تلوک چند ہے۔ شعرا عام طور پر کلام میں اپنا قلمی نام یا تخلص استعمال کرتے ہیں۔

استاد کا نوٹ

الف) 'طیور' لفظ 'طائر' کی جمع ہے، یعنی پرندے؛ اسی طرح جمع کے اور لفظ بھی پہچانیے۔
ب) یہ نظم تلوک چند محرُوؔم کے شعری مجموعے 'گنجِ معانی' سے لی گئی ہے۔
ج) 'ترانۂ وحدت' میں 'ۂ' اضافت کی علامت ہے، یعنی 'وحدت کا ترانہ'۔