NCERT Class 4 Urdu Sitar Chapter 09 Gol Gumbad PDF Download

سبق 9: گول گنبد

[تصویر: میز پر بیٹھا لڑکا خط پڑھتے ہوئے گول گنبد کے بارے میں سوچ رہا ہے، اپنی درسی کتاب میں دیکھیں]

پیارے دوست نوید

آداب!

تمھارا خط ملا۔ یہ جان کر بہت خوشی ہوئی کہ تم اپنے اسکول کی طرف سے چھٹیوں میں کیرالا جا رہے ہو۔

پچھلے سال گرمی کی چھٹّیوں میں ہمارے اسکول نے 'بیجاپور' کی سیر کا پروگرام بنایا۔ یہ جنوبی ہندوستان 'کرناٹک' کا ایک تاریخی شہر ہے۔ اسے اب 'وِجے پور' کہا جاتا ہے۔ یہ شہر عادل شاہی سلطنت کا پایۂ تخت رہا ہے۔ تاریخی عمارتوں کی وجہ سے اس شہر کو دنیا بھر میں شہرت حاصل ہے۔ اس کے کئی تاریخی مقامات قابلِ دید ہیں۔ جیسے ابراہیم روضہ، ملک میدان، آثار محل، بارہ کمان، گگن محل، گول گنبد، تاج باؤلی، قلعہ بیجاپور اور یہاں کی جامع مسجد وغیرہ۔ ان سب میں گول گنبد سب سے مشہور تاریخی عمارت ہے۔ یہاں دُور دُور سے لوگ سیر و سیاحت کے لیے آتے ہیں۔

[تصویر: گول گنبد کے سامنے کھڑے اسکول کے بچے، اپنی درسی کتاب میں دیکھیں]

استاد کا نوٹ

الف) یہ سبق ایک خط کی شکل میں ہے؛ خط 'پیارے دوست نوید' اور 'آداب!' سے شروع ہوتا ہے۔
ب) بیجاپور کرناٹک کا ایک تاریخی شہر ہے جسے اب 'وِجے پور' کہا جاتا ہے؛ یہ عادل شاہی سلطنت کا پایۂ تخت رہا ہے۔
ج) 'پایۂ تخت' یعنی راجدھانی، اور 'قابلِ دید' یعنی دیکھنے کے لائق۔

پیارے دوست! آج میں تمھیں گول گنبد کے بارے میں بتاؤں گا۔ اسے بھارت کا سب سے بڑا گنبد کہا جاتا ہے۔ یہ دنیا کا دوسرا سب سے بڑا گنبد بھی ہے۔ اس کے چار مینار گنبد کی خوب صورتی میں چار چاند لگاتے ہیں۔ میں تو اس کی دل کشی کو دیکھ کر دنگ رہ گیا۔

دوست! ہمارے استادِ محترم ہمیں گائیڈ کے ساتھ لے کر گول گنبد میں داخل ہوئے۔ گائیڈ ہمیں گول گنبد کی تاریخ سے واقف کراتا جا رہا تھا۔ سبھی بچّے بڑی دل چسپی سے اس کی باتیں سن رہے تھے اور اپنی ڈائری میں لکھ رہے تھے۔

اس عمارت کی بنیاد سلطان محمد عادل شاہ نے 1627ء میں رکھی۔ گول گنبد کی تعمیر میں 30 سال لگے۔ ایک ماہر تعمیر 'یاقوت' کی نگرانی میں یہ مکمل ہوا۔ یہ عمارت جنوبی ہندوستان اور عادل شاہی دور کی یادگار ہے۔ یہاں سلطان عادل شاہ کا مقبرہ ہے۔

[تصویر: سلطان عادل شاہ اور پیچھے گول گنبد، اپنی درسی کتاب میں دیکھیں]

استاد کا نوٹ

الف) گول گنبد کی بنیاد سلطان محمد عادل شاہ نے 1627ء میں رکھی اور اس کی تعمیر میں 30 سال لگے۔
ب) یہ ماہر تعمیر 'یاقوت' کی نگرانی میں مکمل ہوا؛ یہاں سلطان عادل شاہ کا مقبرہ ہے۔
ج) 'چار چاند لگانا' یعنی خوب صورتی بہت بڑھا دینا، اور 'دنگ رہ جانا' یعنی حیران رہ جانا۔