NCERT Class 4 Urdu Sitar Chapter 08 Bahadur Rupa PDF Download

سبق 8: بہادر روپا

اسکول میں ایک نئی لڑکی نے داخلہ لیا۔ ٹیچر نے کلاس میں اس کا تعارف کرایا۔ "یہ روپا ہے، یہ اسی کلاس میں پڑھے گی۔" پھر وہ روپا سے بولیں، روپا تمھاری ہم جماعت تمھیں بتا دیں گی کہ وہ کون کون سے سبق پڑھ چکی ہیں۔ کوئی مشکل آنے پر وہ تمھاری مدد بھی کریں گی۔

روپا بہت خوب صورت تھی۔ وہ بولتی بہت کم تھی۔ اس کی ہم جماعت لڑکیاں اس سے دوستی کرنا چاہتی تھیں لیکن وہ ان سے دُور دُور ہی رہتی۔ لڑکیوں نے بھی دو تین دن تو اس سے بات کرنے کی کوشش کی پھر اپنی اپنی سہیلیوں میں مست ہو گئیں۔ انھیں لگا کہ روپا بہت مغرور لڑکی ہے۔ وہ کسی سے بات کرنا پسند نہیں کرتی ہے۔

[تصویر: کلاس میں ٹیچر بچیوں سے روپا کا تعارف کرا رہی ہیں، اپنی درسی کتاب میں دیکھیں]

استاد کا نوٹ

الف) روپا اسکول میں نئی آئی ہے؛ ٹیچر نے کلاس میں اس کا تعارف کرایا۔
ب) 'ہم جماعت' یعنی ایک ہی جماعت میں پڑھنے والے ساتھی۔
ج) 'مغرور' کا مطلب ہے گھمنڈی؛ لڑکیوں کو روپا ایسی ہی لگی کیوں کہ وہ بہت کم بولتی تھی۔

[تصویر: جھیل کے کنارے پھولوں کے درمیان پکنک مناتی لڑکیاں، اپنی درسی کتاب میں دیکھیں]

ایک دن اسکول میں پِکنک کا پروگرام بنا۔ سب نے سوچا روپا نہیں جائے گی لیکن پِکنک کے دن روپا ہی سب سے پہلے اسکول کے گیٹ پر کھڑی تھی۔

پِکنک کی جگہ تھی ایک چھوٹی سی جھیل کا کنارہ۔ اونچے اونچے درختوں سے گھری یہ جگہ پِکنک کے لیے بہت اچھی تھی۔ جھیل کے چاروں طرف پھولوں کی کیاریاں تھیں۔ جنگلی پھولوں کی بھی کوئی کمی نہ تھی۔ پہاڑی علاقہ ہونے کی وجہ سے اونچی نیچی سطح پر پھیلے رنگ برنگے پھول اور بیلیں جھیل کی خوب صورتی کو دوبالا کر رہی تھیں۔

لڑکیوں کے وہاں پہنچتے ہی ان کی ہنسی اور قہقہے سے ماحول گونجنے لگا۔ سبھی اِدھر اُدھر دوڑ کر اپنے لیے اچھے سے اچھا مقام تلاش کرنے لگیں۔ ٹیچر نے ایک خوب صورت جگہ دیکھ کر دریاں بچھوا دیں۔ کچھ لڑکیاں وہیں بیٹھ کر ہنسی مذاق کرنے لگیں۔ کچھ اِدھر اُدھر گھوم کر قدرت کے خوب صورت نظارے سے لطف اندوز ہونے لگیں۔

استاد کا نوٹ

الف) پکنک ایک چھوٹی سی جھیل کے کنارے ہوئی جو اونچے اونچے درختوں سے گھری تھی۔
ب) 'دوبالا کرنا' یعنی دُگنا بڑھا دینا، اور 'لطف اندوز ہونا' یعنی مزہ لینا۔
ج) 'اِدھر اُدھر' اور 'اونچی نیچی' جیسے جوڑے لفظ جملے کو دل چسپ بناتے ہیں۔