NCERT Class 7 Urdu Khayaal Chapter 06 Boodhi Amma Ki Baat PDF Download

سبق 6: بوڑھی امّاں کی بات

گوما موری ایک کسان تھا۔ اس کے پاس گزر بسر کے لیے کھیتی کے علاوہ ایک گائے، ایک جوڑی بیل اور بیس بکریاں تھیں۔ اس کا ایک چھوٹا سا گھر تھا جس کے سامنے جانور باندھنے کا باڑا تھا۔ پچھلے تین سال سے بارش بہت کم ہوئی تھی، اس لیے نہ فصلیں ہوئیں، نہ چارا پیدا ہوا۔ اس سال اساڑھ بھی سوکھا رہ گیا۔ بارش کی کوئی امید نہ رہی۔ "کھیت جوت کر کیا کروں گا؟" گوما نے ایک لمبی سانس چھوڑتے ہوئے دل ہی دل میں سوچا اور بیلوں کو ہانکتے ہوئے واپس گھر کی طرف چل دیا۔

اگلے دن صبح گوما جلدی سو کر اٹھا۔ گائے، بیل اور بکریوں کو باڑے سے نکالا۔ اس کی بیوی گائے اور بکریوں کو لے کر انھیں چَرانے چلی گئی۔ اس نے پھر ہمت کی اور ہَل کو کندھے پر رکھ کر بیلوں کے ساتھ کھیتوں کی طرف چل دیا۔ راستے میں اسے کئی کسانوں نے ٹوک کر کہا کہ "گوما! کھیت جوتنے سے کیا ہو گا؟ بارش کے تو آثار بھی نظر نہیں آ رہے ہیں۔" گوما نے ان سب کی بات سنی۔ کئی بار اس کا دل ڈانواں ڈول بھی ہوا، پھر بھی اس نے ہمت نہیں ہاری اور کھیت پر پہنچ گیا۔

اس نے آسمان کی طرف دیکھا سورج آگ اُگل رہا تھا۔ زمین کو بھی غور سے دیکھا، کھیتوں میں گہری اور چوڑی دراڑیں پڑ گئی تھیں۔ وہ بیلوں کی حالت دیکھ کر بھی فکر مند تھا۔ بھوک پیاس برداشت کرتے کرتے وہ کمزور ہو گئے تھے، اسے کچھ ناامیدی بھی ہونے لگی اور بیلوں کی حالت پر رحم آنے لگا۔

[تصویر: کندھے پر ہل رکھے بیلوں کے ساتھ سوکھے کھیت کی طرف جاتا کسان، اپنی درسی کتاب میں دیکھیں]

استاد کا نوٹ

الف) کسان کا نام گوما موری ہے؛ اس کے پاس ایک گائے، ایک جوڑی بیل اور بیس بکریاں تھیں۔
ب) مسئلہ یہ تھا کہ پچھلے تین سال سے بارش بہت کم ہوئی تھی، اس لیے نہ فصلیں ہوئیں نہ چارا پیدا ہوا۔
ج) 'اساڑھ' برسات کے موسم کا ایک مہینہ ہے؛ 'دل ڈانواں ڈول ہونا' یعنی دل کا فیصلہ نہ کر پانا، اور 'آگ اُگلنا' یعنی بہت تیز گرمی ہونا۔

اس نے پھر ایک لمبی سانس لی اور ایک درخت کے نیچے کھیت کی مینڈ پر بیٹھ کر سوچنے لگا اب کیا کرے، وہ کھیت جوتے یا اسے یوں ہی پڑا رہنے دے۔ وہ غور و فکر میں ڈوبا ہوا تھا۔ تھوڑی دیر بعد اٹھا اور بھاری دل سے بیلوں کو ہانکتے ہوئے اس نے گھر کی راہ لی۔ اس نے فیصلہ کر لیا کہ وہ اُس وقت تک کھیت نہیں جوتے گا جب تک کہ بارش نہیں ہو جاتی۔

دوسرے دن وہ اور بھی مایوس ہو گیا کیوں کہ دھوپ بہت تیز تھی۔ اس کے پاؤں آگے بڑھتے نہ پیچھے ہوتے۔ راستے میں ایک درخت کے سائے میں اس نے بیلوں کو روکا اور وہیں نیچے زمین پر بیٹھ گیا۔

اسی وقت وہاں پر ایک بوڑھی امّاں آ گئیں۔ وہ بھی اسی درخت کے نیچے بیٹھ گئیں۔ گوما نے پوچھا، "ارے! بوڑھی امّاں کہاں سے آ رہی ہو، اتنی تیز دھوپ میں؟ تمھیں کہاں جانا ہے؟" بوڑھی امّاں نے کہا، "میں تو اپنی نواسی سے ملنے پاس کے گاؤں جا رہی ہوں۔ لیکن تم اس وقت یہاں کیا کر رہے ہو؟ یہ وقت تو کھیت میں ہل جوتنے کا ہے، کیا تم بیمار ہو یا تمھارے بیل، کہیں تمھارا ہل تو نہیں ٹوٹ گیا؟"

گوما بولا۔ "نہیں امّاں! نا تو میں بیمار ہوں، نہ میرے بیل بیمار ہیں اور نہ ہی میرا ہل ٹوٹا ہے۔ ٹوٹی ہے تو میری ہمّت! امّاں تم تو واقف ہو، تین سال ہو گئے، بارش ٹھیک سے نہیں ہوئی ہے۔ اس سال بھی یہی حال ہے۔ پھر میں کھیت جوت کر کیا کروں گا؟"

بوڑھی امّاں بولی، "دیکھو بیٹا! بارش تمھارے ہاتھ میں نہیں ہے۔ یہ تو قدرت پر منحصر ہے۔ جب بادل آئیں گے تو بارش ضرور ہو گی۔ تمھارا کام ہے کھیت جوت کر تیار کرنا تم تو اپنا کام وقت پر کرو۔ قدرت اپنا کام کرے گی۔ بارش ضرور ہو گی۔"

[تصویر: درخت کے نیچے بیٹھے گوما اور بوڑھی امّاں، اپنی درسی کتاب میں دیکھیں]

استاد کا نوٹ

الف) بوڑھی امّاں کی بات کا خلاصہ ان کے اپنے الفاظ میں: 'تم تو اپنا کام وقت پر کرو۔ قدرت اپنا کام کرے گی۔'
ب) گوما کا جملہ 'ٹوٹی ہے تو میری ہمّت!' دیکھیے: امّاں نے ہل ٹوٹنے کا پوچھا تھا، اور گوما نے اسی لفظ سے اپنی مایوسی بیان کی۔
ج) 'مینڈ' کھیت کے کنارے کی اونچی مٹی کو کہتے ہیں؛ 'منحصر' یعنی کسی پر موقوف یا ٹکا ہوا۔