NCERT Class 6 Urdu Khayaal Chapter 13 Missile Man PDF Download

سبق 13: میزائل مین

عبدالکلام کا پورا نام ابوالفاخر زین العابدین عبدالکلام تھا۔ تمل ناڈو کے شہر رامیشورم میں 15 اکتوبر 1931 کو پیدا ہوئے۔ ان کے والد زین العابدین اور والدہ آشی اماں تھیں۔ والد ایک درویش صفت انسان تھے جو ماہی گیروں کو مچھلیاں پکڑنے کے لیے کرائے پر کشتیاں دیتے تھے۔ وہ تعلیم یافتہ نہ تھے لیکن تعلیم و تربیت کی ضرورت اور اہمیت سے واقف تھے۔ اس لیے انھوں نے عبدالکلام کی تعلیم میں کوئی رکاوٹ نہیں پیدا ہونے دی۔ عبدالکلام کو خود اپنی تعلیم میں بے حد دل چسپی تھی۔ تنگ دستی کے باوجود انھوں نے تعلیم کا سلسلہ جاری رکھا۔ تعلیم جاری رکھنے کے لیے انھوں نے اخبار بیچے اور ٹیوشن بھی پڑھائی۔ اسکولی تعلیم کے دوران کچھ ایسے واقعات پیش آئے جن سے وہ بے حد متاثر ہوئے۔ ایسے ہی ایک واقعہ کا ذکر کرتے ہوئے ڈاکٹر عبدالکلام نے لکھا ہے: "بچپن میں میرے تین پکّے دوست تھے۔ رامانند شاستری، اروندن اور شیو پرکاشن جب میں پرائمری اسکول کی پانچویں درجے میں تھا، تب ایک نئے استاد ہماری کلاس میں آئے۔ میں اس وقت ٹوپی پہنا کرتا تھا جو میری مذہبی شناخت کو ظاہر کرتا تھا۔ میں کلاس میں ہمیشہ آگے کی صف میں جنیو پہنے رامانند کے ساتھ بیٹھا کرتا تھا۔ نئے استاد کو ایک ہندو لڑکے کا مسلمان لڑکے کے ساتھ بیٹھنا اچھا نہیں لگا۔ انھوں نے مجھے پیچھے والی بینچ پر چلے جانے کو کہا۔ رامانند بھی مجھے پیچھے کی صف میں بٹھائے جاتے دیکھ کر کافی غم گین نظر آنے لگا۔

[تصویر: راکٹ کا ماڈل لیے ڈاکٹر عبدالکلام، اپنی درسی کتاب میں دیکھیں]

اسکول کی چھُٹّی ہونے پر ہم گھر گئے اور سارا واقعہ اپنے گھر والوں کو بتایا۔ رامانند کے والد لکشمن شاستری جو رامیشورم مندر کے خاص پجاری تھے، انھوں نے استاد کو بلایا اور کہا کہ ان معصوم بچوں کے دماغ میں اس طرح کی سماجی نابرابری اور تعصب کا زہر نہیں گھولنا چاہیے۔ استاد کو اپنے برتاؤ پر دکھ ہوا۔ لکشمن شاستری کے کڑے رخ اور سیکولر جذبے سے متاثر ہو کر ان کے رویہ میں بھی تبدیلی آ گئی۔"

استاد کا نوٹ

الف) عبدالکلام کی پیدائش: 15 اکتوبر 1931، رامیشورم (تمل ناڈو)؛ والد زین العابدین اور والدہ آشی اماں۔
ب) بچپن کے تین پکّے دوستوں کے نام یاد رکھیے: رامانند شاستری، اروندن اور شیو پرکاشن؛ رامانند کے والد لکشمن شاستری تھے۔
ج) 'تنگ دستی' یعنی غریبی، 'درویش صفت' یعنی سادہ اور نیک طبیعت، اور 'تعصب' یعنی کسی کے خلاف بے جا بدگمانی۔

ڈاکٹر عبدالکلام کو بچپن ہی سے آسمان کی بلندیوں میں پرواز کرنے کا شوق تھا۔ اپنے اس شوق کی تکمیل کے لیے انھوں نے ہر وہ قربانی پیش کی جسے ناممکن خیال کیا جاتا ہے۔ ان کے یہ الفاظ بڑی اہمیت رکھتے ہیں جو انھوں نے اپنی خود نوشت 'پرواز' (اردو ترجمہ) میں لکھے ہیں: "اگر کوئی انسان سورج کی طرح چمکنا چاہتا ہے تو اسے پہلے سورج کی طرح جلنا ہو گا"، یعنی سخت امتحان سے گزرنا ہو گا۔

[تصویر: بچوں کے ساتھ کھڑے لکشمن شاستری اور استاد، اپنی درسی کتاب میں دیکھیں]

استاد کا نوٹ

الف) عبدالکلام کی خود نوشت (آپ بیتی) کا اردو ترجمہ 'پرواز' کے نام سے ہے۔
ب) ان کا قول یاد رکھیے: 'اگر کوئی انسان سورج کی طرح چمکنا چاہتا ہے تو اسے پہلے سورج کی طرح جلنا ہو گا'۔
ج) 'خود نوشت' کا مطلب ہے اپنے بارے میں خود لکھی ہوئی کتاب؛ 'تکمیل' یعنی پورا کرنا۔