NCERT Class 5 Urdu Sitar Chapter 11 Digital Dadi PDF Download

سبق 9: ڈیجیٹل دادی

رانی ایک چنچل، ہنستی کھیلتی اور ذہین لڑکی تھی۔ وہ سورج پور نام کے ایک چھوٹے سے قصبے میں اپنے ماں باپ، دادی امّاں اور چھوٹے بھائی رابی کے ساتھ رہتی تھی۔ رانی کی عمر گیارہ سال تھی اور وہ ایک سرکاری اسکول میں پانچویں جماعت کی طالبہ تھی۔

رانی کو نئی نئی باتیں سیکھنے کا بڑا شوق تھا۔ وہ ہر روز کچھ نہ کچھ نیا جاننے کی کوشش کرتی۔ کبھی کتابوں سے، کبھی اپنے اسکول ٹیچر سے اور کبھی دادی امّاں کی کہانیوں سے۔ دادی امّاں اسے اکثر پرانے زمانے کی باتیں سناتیں.... جب ہر گھر میں نہ بجلی آئی تھی اور نہ ہی موبائل کی ایجاد ہوئی تھی۔ رانی ان باتوں کو دل لگا کر سنتی اور پھر اپنی دادی پر سوالات کی بوچھار کر دیتی۔

[تصویر: صوفے پر دادی امّاں کے ساتھ باتیں کرتی رانی، اپنی درسی کتاب میں دیکھیں]

استاد کا نوٹ

الف) رانی سورج پور قصبے میں رہتی تھی؛ اس کی عمر گیارہ سال تھی اور وہ پانچویں جماعت میں پڑھتی تھی۔
ب) رانی کتابوں سے، اسکول ٹیچر سے اور دادی امّاں کی کہانیوں سے نئی باتیں سیکھتی تھی۔
ج) 'چنچل' یعنی شوخ اور پھرتیلا، اور 'سوالات کی بوچھار کرنا' یعنی ایک کے بعد ایک بہت سے سوال پوچھنا۔

[تصویر: بستر پر بیٹھی دادی امّاں رانی کو پیسوں کا ڈبّہ دکھا رہی ہیں، اپنی درسی کتاب میں دیکھیں]

ایک دن رانی نے دادی امّاں کو ٹین کے چھوٹے ڈبّے میں پیسے رکھتے دیکھا رانی نے حیرت سے پوچھا: "دادی! آپ ہر بار پیسے پلنگ کے نیچے ہی کیوں رکھتی ہیں؟ اگر چوری ہو جائے تو!"

دادی امّاں مسکرا کر بولیں: "بیٹا! ہم پرانے زمانے کے پانچویں پاس لوگ ہیں۔ بینک کا نظام ہماری سمجھ میں نہیں آتا۔ پیسے آنکھوں کے سامنے رہیں تو تسلّی رہتی ہے۔"

رانی کو یہ بات عجیب لگی۔ اُسے یاد آیا کہ چند دن پہلے اس کی ٹیچر محترمہ میرا نے 'ڈیجیٹل انڈیا' کے بارے میں پڑھایا تھا۔ انھوں نے بتایا تھا کہ آج کل زیادہ تر لوگ اپنا پیسہ بینک میں رکھتے ہیں، جہاں وہ محفوظ رہتا ہے اور آسانی سے کام میں بھی آتا ہے۔ اب تو لوگ اپنے موبائل سے بھی لین دین کر سکتے ہیں۔

رانی نے سوچا: "اگر دادی کو صحیح طریقے سے سمجھایا جائے، تو شاید وہ بھی بینک کا استعمال کر سکیں گی۔"

اگلے دن اسکول میں رانی نے محترمہ میرا سے بات کی، "میڈم! میری دادی ہر مہینے اپنی پنشن کے پیسے ٹین کے ڈبے میں رکھتی ہیں۔ وہ کہتی ہیں کہ بینک کے نظام کو سمجھنا اُن کے بس کی بات نہیں۔"

محترمہ میرا نے مسکرا کر کہا: "رانی! تم بہت سمجھ دار ہو۔ اگر تم چاہو، تو اپنی دادی کو سکھا سکتی ہو کہ بینک کیسے کام کرتا ہے؟ یہ تمھاری دادی کا حق ہے کہ وہ اپنے پیسوں کو محفوظ رکھیں اور خود مختار بنیں۔"

یہ سن کر رانی کو حوصلہ ملا۔ اُس نے طے کیا کہ وہ دادی کو لے کر بینک جائے گی اور ان کا کھاتہ کھلوائے گی۔

[تصویر: کلاس میں محترمہ میرا سے بات کرتی رانی، اپنی درسی کتاب میں دیکھیں]

استاد کا نوٹ

الف) دادی امّاں اپنی پنشن کے پیسے ٹین کے ڈبّے میں رکھتی تھیں کیوں کہ انھیں بینک کا نظام سمجھ میں نہیں آتا تھا۔
ب) ٹیچر محترمہ میرا نے کلاس میں 'ڈیجیٹل انڈیا' کے بارے میں پڑھایا تھا۔
ج) 'کھاتہ کھلوانا' یعنی بینک میں اکاؤنٹ کھلوانا، اور 'خود مختار' یعنی اپنے فیصلے خود کرنے والا۔