NCERT Class 5 Urdu Sitar Chapter 06 Chacha Chhakkan Ki Ainak PDF Download

سبق 5: چچا چھکّن کی عینک

چچا چھکّن کپڑے بدل کر باہر جانے لگے تو عینک کا قصّہ درپیش آیا۔ ایک پاؤں دہلیز کے اندر تھا ایک باہر کہ اچانک خیال آیا کہ غسل کے بعد عینک نہیں لگائی، عینک لینے غسل خانے میں گئے۔ عینک اُتار کھِڑکی میں رکھنا کچھ کچھ یاد تھا لیکن وہاں پہنچ کر اب دیکھا تو موجود نہ تھی۔ طاقوں پر نظر ڈالی، ان میں بھی نہ تھی۔ گھڑونچی کو دیکھا، فرش اور نالی کا جائزہ لیا۔ کہیں نظر نہ آئی۔ سوچا شاید میلے کپڑوں کے ساتھ کوٹھری میں چلی گئی۔ واپس کوٹھری میں پہنچے۔ کپڑے لا کر تخت پر رکھے تھے۔ عینک تخت پر بھی نہ تھی۔ ہر کپڑے کو احتیاط سے جُدا کر کے اُٹھایا۔ ٹٹول ٹٹول کر دیکھا اور جھٹکا: "کہیں بھی نہیں، گئی کہاں؟" قوس اور نیم دائرہ بناتے ہوئے کھڑے گھومتے رہے۔

[تصویر: غسل خانے میں پریشان کھڑے چچا چھکّن، اپنی درسی کتاب میں دیکھیں]

استاد کا نوٹ

الف) چچا چھکّن باہر جانے لگے تو یاد آیا کہ غسل کے بعد عینک نہیں لگائی؛ انھیں عینک کھڑکی میں رکھنا کچھ کچھ یاد تھا۔
ب) 'درپیش آنا' یعنی سامنے آ جانا، اور 'دہلیز' یعنی دروازے کی چوکھٹ کا نچلا حصّہ۔
ج) 'طاق' دیوار میں بنی چھوٹی جگہ ہے، اور 'گھڑونچی' گھڑے رکھنے کا اسٹینڈ ہے۔

[تصویر: بستر پر کپڑوں میں عینک ڈھونڈتے چچا چھکّن، اپنی درسی کتاب میں دیکھیں]

سارے کمرے کا جائزہ لیا کہ بے توجہی میں کسی اور جگہ نہ رکھ دی ہو۔ مایوسی ہوئی۔ لپکے ہوئے پھر غسل خانے میں پہنچے۔ پھر کھڑکی کو دیکھا۔ کھِڑکی کے نیچے نالی تھی۔ اُکڑوں بیٹھ کر اس کا معائنہ بھی کر لیا۔ اِسے ناکافی سمجھ کر باہر گئے۔ غسل خانے سے سڑک تک ساری نالی دیکھ ڈالی، نہ ملی۔ واپس غسل خانے میں پہنچے۔ گردن گھُما گھُما کر طاقوں میں نظر ڈالی۔ گھڑونچی کے نیچے دیکھا۔ گھڑے جگہ سے سرکائے۔ کہیں نظر نہ آئی۔ ذرا دیر پریشانی کے عالم میں کھڑے سر کھُجاتے رہے۔ "عجیب تماشا ہے!" لپکے ہوئے پھر کوٹھری میں پہنچے۔ میلے کپڑے باری باری اس زور سے جھٹکے کہ عینک کیا سوئی بھی لگی ہوتی تو الگ ہو کر گِر پڑتی۔ "لَا حَولَ وَ لَا قُوَّةَ اِلَّا بِاللہ"

استاد کا نوٹ

الف) چچا چھکّن نے عینک غسل خانے، طاقوں، گھڑونچی، کوٹھری، تخت اور سڑک تک کی نالی میں ڈھونڈی مگر کہیں نہ ملی۔
ب) 'اُکڑوں بیٹھنا' یعنی گھٹنے موڑ کر پنجوں کے بل بیٹھنا، اور 'معائنہ' یعنی غور سے جانچنا۔
ج) 'لپکے ہوئے' یعنی جلدی جلدی، اور 'بے توجہی' یعنی دھیان نہ دینا۔