NCERT Class 5 Urdu Sitar Chapter 03 Guru Nanak PDF Download

سبق 3: گرو نانک

ہمارا ملک گنگا جمنی تہذیب کا گہوارہ ہے، اس لیے کہ یہاں بہت سے مذہبوں کے ماننے والے سیکڑوں برس سے ایک ساتھ رہتے آئے ہیں۔ جیسے ہندو، مسلم، سکھ، عیسائی، بودھ اور پارسی وغیرہ۔ ہر مذہب کے رہنماؤں نے اپنی تعلیمات کے ذریعے پیار، محبت، بھائی چارے اور امن کا پیغام دیا ہے۔

ایسے ہی ایک بزرگ سِکھ مذہب کے رہنما گرو نانک تھے۔

گرو نانک کی پیدائش 1469 میں دریائے راوی کے کنارے آباد ایک گاؤں تَل وَنڈی میں ہوئی۔ یہ گاؤں اب پاکستان میں ہے اور لاہور کے جنوب میں واقع ہے۔ اس گاؤں کو اب 'ننکانہ صاحب' کہتے ہیں۔

گرو نانک اِس گاؤں کے ایک منیم کالو چند کے بیٹے تھے۔

[تصویر: گرو نانک، اپنی درسی کتاب میں دیکھیں]

استاد کا نوٹ

الف) گرو نانک سکھ مذہب کے رہنما تھے؛ ان کی پیدائش 1469 میں دریائے راوی کے کنارے گاؤں تَل وَنڈی میں ہوئی۔
ب) تَل وَنڈی اب پاکستان میں لاہور کے جنوب میں ہے اور اسے 'ننکانہ صاحب' کہتے ہیں؛ ان کے والد کا نام کالو چند تھا۔
ج) 'گہوارہ' یعنی پالنا یا پرورش کی جگہ، اور 'گنگا جمنی تہذیب' یعنی مختلف مذہبوں کے لوگوں کی مِلی جُلی تہذیب۔

ان کے نام کے بارے میں یہ بات مشہور ہے کہ ان کی بڑی بہن کی پیدائش اپنے نانا کے گھر میں ہوئی، اس لیے انھیں نانکی یعنی 'ناناکی' کہتے تھے۔ اپنی بڑی بہن کے نام پر ان کو نانک یعنی نانا کا کہنے لگے اور یہی ان کا نام پڑ گیا۔

بچپن ہی سے گرو نانک کی عادتیں عام بچّوں سے مختلف تھیں۔ انھیں کھیل کود کا شوق نہیں تھا۔ جیب خرچ کے پیسے بھی وہ اپنی ذات پر خرچ کرنے کے بجائے ضرورت مندوں میں تقسیم کر دیتے تھے۔ جب ان کی تعلیم کا سلسلہ شروع ہوا تو انھوں نے ریاضی اور فارسی زبان بہت حد تک سیکھ لی۔ آگے پڑھائی میں ان کا جی نہیں لگا۔ جب وہ بڑے ہوئے تو ان کے والد نے پہلے انھیں کھیتی باڑی اور پھر تجارت کرنے کے لیے کہا۔ تاہم انھوں نے کسی کام میں دلچسپی نہیں لی کیوں کہ ان کا دل دنیا داری میں نہیں لگتا تھا۔

ایک دن گرو نانک کے والد نے انھیں کچھ روپے دے کر لاہور بھیجا اور کہا کہ ایسا کھرا سودا کرنا جس سے کچھ نفع ہو۔

[تصویر: گرو نانک اپنے والد سے بات کرتے ہوئے، اپنی درسی کتاب میں دیکھیں]

استاد کا نوٹ

الف) بڑی بہن کا نام 'نانکی' اس لیے پڑا کہ ان کی پیدائش نانا کے گھر ہوئی؛ اسی نام پر گرو نانک کا نام 'نانک' پڑا۔
ب) گرو نانک جیب خرچ کے پیسے ضرورت مندوں میں بانٹ دیتے تھے؛ انھوں نے ریاضی اور فارسی زبان سیکھی۔
ج) 'دنیا داری' یعنی دنیا کے کام کاج میں لگے رہنا، اور 'کھرا سودا' یعنی سچا اور فائدے والا سودا۔